സൗദിയിൽ നിന്ന് യാത്ര ചെയ്യുന്നവർ ശ്രദ്ധിക്കുക; വിമാന സർവീസുകളിൽ മാറ്റത്തിന് സാധ്യത, യാത്രാ വിവരം മുൻകൂട്ടി പരിശോധിക്കണമെന്ന് അധികൃതർ

പശ്ചിമേഷ്യയിൽ നിലനിൽക്കുന്ന സംഘർഷാവസ്ഥയെത്തുടർന്ന് വിമാന സർവീസുകളിൽ മാറ്റം വരാൻ സാധ്യതയുള്ളതിനാൽ യാത്രക്കാർ ശ്രദ്ധിക്കണമെന്ന് ജിദ്ദ, റിയാദ് വിമാനത്താവള അധികൃതർ അറിയിച്ചു.

ഞായറാഴ്ച പുറത്തിറക്കിയ പ്രത്യേക യാത്രാ ജാഗ്രതാ നിർദ്ദേശത്തിലാണ് വിമാനത്താവളത്തിലേക്ക് തിരിക്കുന്നതിന് മുൻപ് സർവീസുകളെക്കുറിച്ച് ഉറപ്പുവരുത്താൻ യാത്രക്കാരോട് ആവശ്യപ്പെട്ടിരിക്കുന്നത്.

ജിദ്ദയിലെ കിംഗ് അബ്ദുൽ അസീസ് അന്താരാഷ്ട്ര വിമാനത്താവളം വഴി യാത്ര ചെയ്യുന്നവർ തങ്ങളുടെ എയർലൈനുകളുമായി നേരിട്ട് ബന്ധപ്പെട്ട് വിമാനങ്ങളുടെ സമയക്രമം സ്ഥിരീകരിക്കണമെന്ന് അറിയിപ്പിൽ പറയുന്നു.

തെറ്റായ വിവരങ്ങൾ ഒഴിവാക്കാൻ വിമാനത്താവളത്തിന്റെയോ ബന്ധപ്പെട്ട എയർലൈനുകളുടെയോ ഔദ്യോഗിക വാർത്താവിനിമയ ചാനലുകളെ മാത്രം ആശ്രയിക്കണമെന്നും അധികൃതർ വ്യക്തമാക്കി.

മേഖലയിലെ നിലവിലെ സാഹചര്യങ്ങൾ ബാധിച്ചിട്ടുള്ള സ്ഥലങ്ങളിലേക്ക് യാത്ര ചെയ്യുന്നവർ അതീവ ശ്രദ്ധ പുലർത്തണമെന്ന് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവള അധികൃതരും നിർദ്ദേശിച്ചു.

വിമാനത്താവളത്തിലേക്ക് വരുന്നതിന് മുൻപ് ഏറ്റവും പുതിയ ഫ്ലൈറ്റ് അപ്‌ഡേറ്റുകൾ പരിശോധിക്കണം. യാത്രക്കാർക്ക് ആവശ്യമായ സഹായങ്ങൾക്കായി എയർപോർട്ട് ഹെൽപ്പ് ഡെസ്കുമായി ബന്ധപ്പെടാവുന്നതാണ്.

മേഖലയിൽ വർദ്ധിച്ചുവരുന്ന സൈനിക സംഘർഷങ്ങൾ വ്യോമഗതാഗതത്തെ കാര്യമായി ബാധിച്ചിട്ടുണ്ട്. പല മിഡിൽ ഈസ്റ്റ് രാജ്യങ്ങളും തങ്ങളുടെ വ്യോമപാതകളിൽ നിയന്ത്രണങ്ങൾ ഏർപ്പെടുത്തിയതും വിമാനങ്ങൾ വഴിതിരിച്ചുവിട്ടതും ഷെഡ്യൂളുകളിൽ മാറ്റം വരാൻ കാരണമായിട്ടുണ്ട്.

ഈ സാഹചര്യത്തിലാണ് യാത്രക്കാരുടെ സൗകര്യാർത്ഥം സൗദിയിലെ വിമാനത്താവളങ്ങൾ ജാഗ്രതാ നിർദ്ദേശം നൽകിയിരിക്കുന്നത്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa