ദുബായിക്കും അബുദാബിക്കും വെല്ലുവിളി; ആഢംബര വിനോദസഞ്ചാരത്തിന്റെ ആഗോള കേന്ദ്രമാകാൻ ജിദ്ദ, നാല് അന്താരാഷ്ട്ര ബ്രാൻഡുകൾ നഗരത്തിലേക്ക്

ജിദ്ദ: സൗദി അറേബ്യയുലെ നഗരവികസനത്തിന് ഊർജ്ജം പകർന്ന്, ജിദ്ദയെ ആഢംബര വിനോദസഞ്ചാരത്തിൻ്റെ ആഗോള കേന്ദ്രമാക്കി മാറ്റാൻ നാല് പ്രമുഖ അന്താരാഷ്ട്ര ബ്രാൻഡുകൾ പദ്ധതികൾ പ്രഖ്യാപിച്ചു.

അറ്റ്‌ലാൻ്റിസ്, വൺ & ഓൺലി, ഫോർ സീസൺസ്, മാൻഡറിൻ ഓറിയന്റൽ എന്നീ ലോകോത്തര ഹോട്ടൽ ശൃംഖലകളാണ് ജിദ്ദയുടെ കടൽത്തീരത്ത് കൂറ്റൻ പദ്ധതികൾക്ക് തുടക്കം കുറിക്കുന്നത്.

ജിദ്ദയുടെ ഹൃദയഭാഗത്തെ പുനർനിർമ്മിക്കുന്ന സെൻട്രൽ പ്രോജക്ടിന്റെ ഭാഗമാണ് ഈ പുതിയ ഹോട്ടൽ സംരംഭങ്ങൾ. അത്യാധുനിക മാരിന, ഒരു ലോകോത്തര ഓപ്പറ ഹൗസ്, ആധുനിക മ്യൂസിയങ്ങൾ, മറൈൻ ഗാർഡനുകൾ, സംയോജിത വിനോദ-കായിക കേന്ദ്രങ്ങൾ എന്നിവ ഉൾപ്പെടുന്ന വലിയ നഗര പരിവർത്തനമാണ് ഈ പദ്ധതിയിലൂടെ ലക്ഷ്യമിടുന്നത്.

കിംഗ് അബ്ദുൽ അസീസ് അന്താരാഷ്ട്ര വിമാനത്താവളത്തിൽ നിന്ന് ഏതാനും മിനിറ്റുകൾ മാത്രം അകലെയുള്ള ജിദ്ദയുടെ തന്ത്രപരമായ സ്ഥാനം ഈ പുതിയ ലക്ഷ്യസ്ഥാനത്തിന് ഗുണകരമാകും. ഇത് ആഢംബരവും അതുല്യവുമായ ടൂറിസം അനുഭവങ്ങൾ തേടുന്ന അന്താരാഷ്ട്ര സന്ദർശകരെ ആകർഷിക്കാൻ സഹായിക്കും.

ജിദ്ദയിലെത്തുന്ന പ്രമുഖ ഹോട്ടൽ ബ്രാൻഡുകളും അവയുടെ സവിശേഷതകളും:

അറ്റ്‌ലാൻ്റിസ് ജിദ്ദ (Atlantis Jeddah): 800-ൽ അധികം മുറികളും സ്യൂട്ടുകളും അപ്പാർട്ട്‌മെൻ്റുകളും 20 അന്താരാഷ്ട്ര റെസ്റ്റോറന്റുകളും ഉൾപ്പെടുന്ന ബൃഹത്തായ റിസോർട്ട്. കൂടാതെ, പ്രശസ്തമായ ‘അക്വാവെഞ്ചർ’ വാട്ടർ പാർക്ക്, ‘ലോസ്റ്റ് ചേംബേഴ്സ്’ അക്വേറിയം എന്നിവയും ഇവിടെയുണ്ടാകും.

വൺ & ഓൺലി ജിദ്ദ (One & Only Jeddah): കടൽത്തീരവും പ്രകൃതിയും ആഡംബര ജീവിതശൈലിയും സമന്വയിപ്പിക്കുന്ന ഈ ആഢംബര ഹോട്ടലിൽ സ്വകാര്യ വില്ലകളും സൗദിയിലെ ആദ്യത്തെ റെസിഡൻഷ്യൽ കോംപ്ലക്സും ഉണ്ടാകും.

മാൻഡറിൻ ഓറിയന്റൽ ജിദ്ദ (Mandarin Oriental Jeddah): ചെങ്കടലിന് അഭിമുഖമായുള്ള 140 മുറികളും സ്യൂട്ടുകളും 187 ആഢംബര വസതികളും 115 അപ്പാർട്ട്‌മെൻ്റുകളും ഉൾപ്പെടുന്ന ടവർ. ഒരു സ്പാ, കിഡ്‌സ് ക്ലബ്ബുകൾ, എക്‌സ്‌ക്ലൂസീവ് റെസ്റ്റോറന്റുകൾ എന്നിവയും ഇതിൻ്റെ ഭാഗമാകും.

ഫോർ സീസൺസ് ജിദ്ദ – കോർണിഷ് (Four Seasons Jeddah – Corniche – 2027-ൽ തുറക്കും): 269 മുറികളും സ്യൂട്ടുകളും 64 സ്വകാര്യ റെസിഡൻഷ്യൽ യൂണിറ്റുകളും ഉൾപ്പെടുന്നു. കടലിന് അഭിമുഖമായുള്ള നീന്തൽക്കുളങ്ങളും മികച്ച റെസ്റ്റോറന്റുകളും ഇതിൻ്റെ പ്രത്യേകതയാണ്.

ഈ ആഗോള നിക്ഷേപങ്ങളുടെ വേഗത വർദ്ധിക്കുന്നതോടെ, അടുത്ത കുറച്ച് വർഷങ്ങൾക്കുള്ളിൽ ദുബായ്, അബുദാബി തുടങ്ങിയ പ്രമുഖ ടൂറിസം നഗരങ്ങളുമായി മത്സരിക്കാൻ ജിദ്ദ ഒരുങ്ങുകയാണ്. ആഢംബരം, വലിയ പരിപാടികൾ, ഉന്നത നിലവാരമുള്ള ടൂറിസം എന്നിവയുടെ ഒരു പ്രധാന പ്രാദേശിക കേന്ദ്രമായി ജിദ്ദ മാറും എന്ന് പ്രതീക്ഷിക്കുന്നു.

ജിദ്ദയുടെ ചരിത്രപരമായ തനിമയും വാസ്തുവിദ്യാപരമായ പ്രത്യേകതകളും സമന്വയിപ്പിച്ചാണ് ഈ പദ്ധതികളുടെ രൂപകൽപ്പന. ആധുനിക ആഢംബരവും മനോഹരമായ കടൽ കാഴ്ചകളും സാംസ്കാരികപരമായ അന്തരീക്ഷവും ഇവിടെ ഒത്തുചേരുന്നു.

ആഢംബര ടൂറിസത്തിനുള്ള ഡിമാൻഡ് വർദ്ധിപ്പിക്കാനും കൂടുതൽ നിക്ഷേപം ആകർഷിക്കാനും പതിനായിരക്കണക്കിന് പുതിയ തൊഴിലവസരങ്ങൾ സൃഷ്ടിക്കാനും ഇത് സഹായിക്കുമെന്നാണ് പ്രതീക്ഷിക്കുന്നത്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa