ഇറാൻ-ഇസ്രായേൽ യുദ്ധം എസ്കലേഷൻ ട്രാപ്പിലേക്ക്; ഇറാൻ കൂടുതൽ കരുത്താർജ്ജിക്കുന്നുവെന്ന് റോബർട്ട് പേപ്പ്

ഇറാൻ-ഇസ്രായേൽ യുദ്ധം അതീവ അപകടകരമായ മൂന്നാം ഘട്ടത്തിലേക്ക് പ്രവേശിക്കുകയാണെന്നും ഇത് ദീർഘകാലം നീണ്ടുനിൽക്കുന്ന ഒരു പോരാട്ടമായി മാറുമെന്നും അമേരിക്കൻ രാഷ്ട്രീയ നിരീക്ഷകനും ചിക്കാഗോ സർവകലാശാലയിലെ പൊളിറ്റിക്കൽ സയൻസ് പ്രൊഫസറുമായ റോബർട്ട് പേപ്പ്.

സംഘർഷം കൂടുതൽ വഷളാകുന്ന ‘എസ്കലേഷൻ ട്രാപ്പ്’ എന്ന അവസ്ഥയിലാണ് നിലവിൽ ഇരുരാജ്യങ്ങളുമെന്ന് അദ്ദേഹം നിരീക്ഷിക്കുന്നു. യുദ്ധം കടന്നുപോയതും ഇനി കടന്നുപോകാൻ പോകുന്നതുമായ ഘട്ടങ്ങൾ റോബർട്ട് പേപ്പ് വിവരിക്കുന്നു.

ഒന്നാം ഘട്ടം (അമിത ആത്മവിശ്വാസം): കുറഞ്ഞ ദിവസങ്ങൾക്കുള്ളിൽ അതിശക്തമായ ആക്രമണത്തിലൂടെ ഇറാൻ ഭരണകൂടത്തെ തകർക്കാമെന്ന ഇസ്രായേലിന്റെയും സഖ്യകക്ഷികളുടെയും വിശ്വാസമായിരുന്നു ആദ്യ ഘട്ടം. എന്നാൽ ഈ നീക്കം വിജയിച്ചില്ല.

രണ്ടാം ഘട്ടം (ഇറാന്റെ തിരിച്ചടി): ആക്രമണങ്ങളെ അതിജീവിച്ച ഇറാൻ കൂടുതൽ ശക്തിയോടെ തിരിച്ചടിക്കുന്നതാണ് രണ്ടാം ഘട്ടം. ബോംബാക്രമണങ്ങൾക്ക് മുൻപുണ്ടായിരുന്നതിനേക്കാൾ സൈനികമായ കരുത്ത് ഇപ്പോൾ ഇറാൻ പ്രകടിപ്പിക്കുന്നുണ്ടെന്ന് അദ്ദേഹം ചൂണ്ടിക്കാട്ടുന്നു.

മൂന്നാം ഘട്ടം (നീണ്ടുനിൽക്കുന്ന യുദ്ധം): നിലവിൽ യുദ്ധം മൂന്നാം ഘട്ടത്തിലേക്ക് കടക്കുകയാണ്. ഇത് വർഷങ്ങളോളം നീണ്ടുനിൽക്കുന്ന ഒന്നായി മാറിയേക്കാം.

യുദ്ധം നീണ്ടുപോകുന്നത് ഇസ്രായേലിനും സഖ്യകക്ഷികൾക്കും വലിയ വെല്ലുവിളിയാകുമെന്ന് പേപ്പ് മുന്നറിയിപ്പ് നൽകുന്നു. പ്രത്യേകിച്ച് വെടിക്കോപ്പുകളുടെയും മിസൈലുകളുടെയും ലഭ്യതയിൽ ഇസ്രായേൽ സഖ്യം പ്രതിസന്ധി നേരിട്ടേക്കാം.

ഇറാൻ തങ്ങളുടെ സൈനിക ശേഷി യുദ്ധത്തിനനുസരിച്ച് മാറ്റിക്കഴിഞ്ഞു. ഒരേസമയം വലിയ ആക്രമണങ്ങൾ നടത്തുന്നതിന് പകരം, കാലക്രമേണ സമ്മർദ്ദം വർദ്ധിപ്പിക്കുന്ന തന്ത്രമായിരിക്കും ടെഹ്‌റാൻ സ്വീകരിക്കുക.

ശത്രുവിനെ തളർത്തുന്ന തരത്തിലുള്ള ഒരു ദീർഘകാല പോരാട്ടത്തിനാണ് ഇറാൻ ലക്ഷ്യമിടുന്നത്. ഇത് മിഡിൽ ഈസ്റ്റിലെ സമാധാന ശ്രമങ്ങൾക്ക് വലിയ തിരിച്ചടിയാണെന്നും അദ്ദേഹം കൂട്ടിച്ചേർത്തു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa