സൗദിയിൽ ആദ്യമായി ഡ്രൈവറില്ലാ ഹൈഡ്രജൻ ട്രക്ക് പുറത്തിറക്കി; വൻ വിപ്ലവത്തിനൊരുങ്ങി ട്രാൻസ്പോർട്ട് അതോറിറ്റി
റിയാദ്: പരിസ്ഥിതി സൗഹൃദവും സുസ്ഥിരവുമായ ഗതാഗത സംവിധാനങ്ങൾ പ്രോത്സാഹിപ്പിക്കുന്നതിന്റെ ഭാഗമായി സൗദി ട്രാൻസ്പോർട്ട് അതോറിറ്റി രാജ്യത്തെ ആദ്യത്തെ പരിസ്ഥിതി സൗഹൃദ ഹൈഡ്രജൻ അധിഷ്ഠിത ഹെവി ഡ്യൂട്ടി ട്രക്ക് പുറത്തിറക്കി.
പൂർണ്ണമായും സ്വയം നിയന്ത്രിതമായി ഓടിക്കാൻ കഴിയുന്ന അത്യാധുനിക ഡ്രൈവിംഗ് സാങ്കേതികവിദ്യകളോടെയാണ് ഈ ട്രക്ക് രൂപകൽപ്പന ചെയ്തിരിക്കുന്നത്. സൗദി ഊർജ്ജ മന്ത്രാലയത്തിന്റെയും, ഗതാഗത-ലോജിസ്റ്റിക്സ് മന്ത്രാലയത്തിന്റെയും പൂർണ്ണ പിന്തുണയോടെയാണ് ഈ പദ്ധതി നടപ്പിലാക്കിയത്.
പ്രൊക്ടർ ആൻഡ് ഗാംബിൾ, ഇസ്മായിൽ അബു ദാവൂദ് കമ്പനി, ഹൈപ്പർവ്യൂ കമ്പനി എന്നിവരുമായി സഹകരിച്ചാണ് ഏറെ സവിശേഷതകളുള്ള ഈ അത്യാധുനിക ഹെവി ട്രക്ക് യാഥാർത്ഥ്യമാക്കിയത്.
ഹാനികരമായ പുകയോ കാർബൺ മലിനീകരണമോ ഇല്ലാതെ പൂർണ്ണമായും ശുദ്ധമായ ഹൈഡ്രജൻ ഊർജ്ജത്തിലാണ് ഈ ട്രക്ക് പ്രവർത്തിക്കുന്നത്. ഏതാനും മിനിറ്റുകൾക്കുള്ളിൽ ഇതിൽ ഹൈഡ്രജൻ ഇന്ധനം നിറയ്ക്കാൻ സാധിക്കും.
ഒറ്റത്തവണ ഇന്ധനം നിറച്ചാൽ 1500 കിലോമീറ്റർ വരെ ദൂരം ഓടിക്കാൻ സാധിക്കും. ഇത് ദീർഘദൂര ചരക്കുനീക്കങ്ങൾക്ക് ഈ ട്രക്കിനെ ഏറെ അനുയോജ്യമാക്കുന്നു.
ഒന്നിലധികം ലെവലുകളിലുള്ള സ്വയംഭരണ ഡ്രൈവിംഗ് സാങ്കേതികവിദ്യയാണ് ഇതിലുള്ളത്. ആർട്ടിഫിഷ്യൽ ഇന്റലിജൻസ് (AI), അത്യാധുനിക സോഫ്റ്റ്വെയറുകൾ, ഡിജിറ്റൽ സിസ്റ്റങ്ങൾ എന്നിവയുടെ സഹായത്തോടെയാണ് ട്രക്കിന്റെ പ്രവർത്തനം.
ഗതാഗത മേഖലയിൽ ആധുനിക സാങ്കേതികവിദ്യകൾ നടപ്പിലാക്കുന്നതിലൂടെ ലോജിസ്റ്റിക്സ് മേഖലയുടെ കാര്യക്ഷമത വർദ്ധിപ്പിക്കുകയാണ് സൗദി അറേബ്യ ലക്ഷ്യമിടുന്നത്.
കാർബൺ മലിനീകരണം വൻതോതിൽ കുറയ്ക്കാനും, വിതരണ ശൃംഖലകൾ കൂടുതൽ സുഗമമാക്കാനും ഈ ഡ്രൈവറില്ലാ ഹൈഡ്രജൻ ട്രക്ക് സഹായിക്കും. കൂടാതെ, ഇതിലെ അത്യാധുനിക സുരക്ഷാ സംവിധാനങ്ങൾ റോഡപകടങ്ങൾ കുറയ്ക്കാനും ഉതകുന്നതാണ്.
അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa