സൗദിയിലെ വിവിധ പ്രദേശങ്ങളിൽ ശക്തമായ പൊടിക്കാറ്റിന് സാധ്യത; ദൂരക്കാഴ്ച കുറയുമെന്ന് കാലാവസ്ഥാ കേന്ദ്രത്തിന്റെ ജാഗ്രതാ നിർദ്ദേശം

റിയാദ്: സൗദി അറേബ്യയുടെ വിവിധ ഭാഗങ്ങളിൽ ശക്തമായ പൊടിക്കാറ്റിന് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം (NMC) മുന്നറിയിപ്പ് നൽകി. പലയിടങ്ങളിലും ദൂരക്കാഴ്ച പൂർണ്ണമായോ ഭാഗികമായോ തടസ്സപ്പെടാൻ സാധ്യതയുണ്ടെന്ന് അധികൃതർ വ്യക്തമാക്കി.

ദമ്മാം, ദഹ്റാൻ എന്നീ നഗരങ്ങൾ ഉൾപ്പെടുന്ന കിഴക്കൻ പ്രവിശ്യയിൽ (ഖത്തീഫ്, അൽ-ഖോബാർ, ജുബൈൽ, റാസ് തനൂറ, ഹഫർ അൽ-ബാത്തിൻ, അൽ-അഹ്സ, അൽ-ഖഫ്ജി, അൽ-നുഐരിയ, ഖര്യത്ത് അൽ-ഉൽയ, ബുഖൈഖ്, അൽ-അദീദ്) ശക്തമായ കാറ്റ് വീശിയടിക്കാൻ സാധ്യതയുണ്ട്.

ഹൈവേകളിലും തുറസ്സായ സ്ഥലങ്ങളിലും പൊടിപടലങ്ങൾ ഉയരുന്നതിനാൽ ദൂരക്കാഴ്ച 1 മുതൽ 3 കിലോമീറ്റർ വരെയായി കുറയാൻ ഇത് കാരണമാകും.

വടക്കൻ അതിർത്തി പ്രദേശങ്ങൾ, അൽ-ജൗഫ്, തബൂക്ക്, ഹാഇൽ, മദീന മുനവ്വറ, റിയാദ് എന്നിവിടങ്ങളിൽ ശക്തമായ കാറ്റും പൊടിക്കാറ്റും തുടരുമെന്നാണ് പ്രവചനം.

ഹൈവേകളിലൂടെ യാത്ര ചെയ്യുന്നവരും വാഹനമോടിക്കുന്നവരും അതീവ ജാഗ്രത പാലിക്കണമെന്നും ഔദ്യോഗിക കേന്ദ്രങ്ങളിൽ നിന്നുള്ള നിർദ്ദേശങ്ങൾ കർശനമായി പിന്തുടരണമെന്നും അധികൃതർ ആവശ്യപ്പെട്ടു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa