‘ഞാൻ പോയെന്ന് ഉമ്മയോട് പറഞ്ഞേക്കണേ’; ഭിന്നശേഷിക്കാരനായ പതിനാറുകാരൻ മദീനയിൽ മരണപ്പെട്ടു

മദീന: തൻ്റെ ഏറ്റവും വലിയ ആഗ്രഹമായിരുന്ന ഉംറ തീർത്ഥാടനം പൂർത്തിയാക്കിയ ശേഷം, പുണ്യഭൂമിയായ മദീനയിൽ വെച്ച് കോഴിക്കോട് കുന്ദമംഗലം സ്വദേശിയായ 16 വയസ്സുകാരൻ മുഹമ്മദ് അൻസിൽ ലോകത്തോട് വിടചൊല്ലി.

ഭിന്നശേഷിക്കാരനായ അൻസിൽ, തൻ്റെ വല്യുപ്പയുടെയും വല്യുമ്മയുടെയും കൂടെയാണ് വീൽചെയറിൽ മക്കയിലെത്തി ഉംറ നിർവഹിക്കാനെത്തിയത്.

ഉംറയുടെ വിശുദ്ധിയിൽ നിന്നുകൊണ്ട്, പ്രവാചകൻ്റെ പൂങ്കാവനമായ മദീന സന്ദർശിക്കുന്നതിനിടയിലാണ് അപ്രതീക്ഷിത മരണം സംഭവിച്ചത്.

നാട്ടിലുള്ള ഉമ്മയെ കാണാൻ അതിയായി ആഗ്രഹിച്ചായിരുന്നു ഈ കൗമാരക്കാരൻ്റെ മടക്കം. യാത്രയ്ക്ക് തയ്യാറെടുക്കുന്നവനെപ്പോലെ പുലർച്ചെ എഴുന്നേറ്റ് അംഗശുദ്ധി വരുത്തിയ ശേഷം, നിറകണ്ണുകളോടെ അവൻ ഉമ്മയെ കാണാനുള്ള ആഗ്രഹം പ്രകടിപ്പിച്ചു.

എന്നാൽ, നേരം പുലരും വരെ കാത്തിരിക്കാമെന്ന് വല്യുമ്മ ആശ്വസിപ്പിക്കാൻ ശ്രമിച്ചെങ്കിലും, അൻസിൽ മറ്റൊരു യാത്രയ്ക്ക് ഒരുങ്ങുകയായിരുന്നു.

അവൻ്റെ അന്ത്യനിമിഷങ്ങൾ പങ്കുവെച്ച മദീന കെ.എം.സി.സി. വെൽഫെയർ വിങ്ങിൻ്റെ കുറിപ്പാണ് ആരെയും കണ്ണീരണിയിക്കുന്നത്. “ഉമ്മയോട് ഞാൻ പോയി എന്ന് പറഞ്ഞേക്കണേ…” എന്നായിരുന്നു ഒരു മകന്റെ ഹൃദയം നുറുങ്ങുന്ന ആ അന്തിമ മൊഴി.

ഈ വാക്കുകൾക്ക് ശേഷം അവൻ ശാന്തനായി ‘കലിമ’ ചൊല്ലി, പുലർച്ചെ 3:30-ന്, പ്രഭാതത്തിന് തൊട്ടുമുമ്പ് മരണം അവനെ പുൽകി. നേരത്തെ അൻസിലിൻ്റെ സഹോദരനും രോഗം ബാധിച്ച് മരണപ്പെട്ടിരുന്നു.

അപ്രതീക്ഷിതമായ ഈ ദുരന്തത്തിൽ എന്തുചെയ്യണമെന്നറിയാതെ വല്യുപ്പയും വല്യുമ്മയും തളർന്നുപോയി. ഈ സ്തംഭനാവസ്ഥയിൽ, കുന്ദമംഗലം ഗ്ലോബൽ കെ.എം.സി.സി. വഴി മദീന കെ.എം.സി.സി. വെൽഫെയർ വിങ്ങിന് വിവരം കൈമാറി. ഉടൻതന്നെ കെ.എം.സി.സി. പ്രതിനിധികൾ അവർ താമസിച്ച ഹോട്ടലിലെത്തി, ആ വയോധികർക്ക് സാന്ത്വനവും നിയമപരമായ സഹായവും നൽകി.

സ്വർഗ്ഗതുല്യമായ ജന്നത്തുൽ ബഖീഇൽ (പ്രവാചകന്റെ പള്ളിക്ക് സമീപമുള്ള മദീനയിലെ ഖബർസ്ഥാൻ) അൻസിലിന് ശാശ്വത വിശ്രമം നൽകാനുള്ള നടപടിക്രമങ്ങൾ പുരോഗമിക്കുകയാണ്.

ഉമ്മയെ കാണാൻ കൊതിച്ച്, വിടവാങ്ങലിൻ്റെ സന്ദേശം കൈമാറി വിശുദ്ധിയുടെ മണ്ണിൽ നിത്യനിദ്രയിലാണ്ട ഈ പതിനാറുകാരന്റെ ഓർമ്മകൾ പ്രവാസലോകത്തിന് നീറുന്ന അനുഭവമായി അവശേഷിക്കും.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa