സൗദിയിൽ കനത്ത മഴ; തബൂക്കിൽ നടുറോഡിൽ ഗർത്തം രൂപപ്പെട്ടു, ജാഗ്രതാ നിർദ്ദേശവുമായി സിവിൽ ഡിഫൻസ്

സൗദി അറേബ്യയുടെ വിവിധ ഭാഗങ്ങളിൽ ഇന്ന് കനത്ത മഴ പെയ്തു. യൻബു പ്രവിശ്യയിലും ഇന്ന് ഉച്ച മുതൽ ശക്തമായ കാറ്റ്, ഇടിമിന്നൽ, ആലിപ്പഴ വർഷം എന്നിവയോടു കൂടിയ കനത്ത മഴ കാരണം താഴ്‌വരകളിലും അരുവികളിലും മലവെള്ളപ്പാച്ചിൽ ഉണ്ടായി.

മഴ ആദ്യം വടക്കൻ കേന്ദ്രങ്ങളിൽ കേന്ദ്രീകരിക്കുകയും പിന്നീട് യൻബു അൽ-ബഹർ, യൻബു ഇൻഡസ്ട്രിയൽ സിറ്റി, യൻബു അൽ-നഖൽ, മറ്റ് ഗ്രാമങ്ങൾ എന്നിവിടങ്ങളിലേക്ക് വ്യാപിക്കുകയും ചെയ്തു. പ്രദേശങ്ങളിൽ ഇപ്പോഴും മേഘാവൃതമായ കാലാവസ്ഥ തുടരുകയാണ്.വെള്ളക്കെട്ടുകൾ കൈകാര്യം ചെയ്യുന്നതിനായി ബന്ധപ്പെട്ട വകുപ്പുകൾ സജ്ജരായി രംഗത്തുണ്ട്.

വെള്ളക്കെട്ടുകൾ, ഓടകൾ ഇല്ലാത്ത പ്രദേശങ്ങൾ എന്നിവിടങ്ങളിൽ നിന്ന് വെള്ളം പമ്പ് ചെയ്യാനും ഒഴുക്കിവിടാനും ഫീൽഡ് ടീമുകൾ മുൻകൂട്ടി തയ്യാറാക്കിയ അടിയന്തര പദ്ധതികൾ അനുസരിച്ച് പ്രവർത്തിക്കുന്നു. യൻബു അൽ-ബഹർ മുനിസിപ്പാലിറ്റി വെള്ളക്കെട്ടുകൾ നീക്കം ചെയ്യാനുള്ള ശ്രമങ്ങൾ തുടരുകയാണ്.

വെള്ളപ്പൊക്കത്തിൽ തകർന്ന റോഡുകൾ നന്നാക്കുന്നതിനും ഗതാഗതം സുഗമമാക്കുന്നതിനും മുനിസിപ്പാലിറ്റികൾ നടപടിയെടുക്കുന്നു. തകരാറിലായ റോഡുകളിൽ മുന്നറിയിപ്പ് ബോർഡുകൾ സ്ഥാപിക്കുകയും വാഹനമോടിക്കുന്നവരോട് ജാഗ്രത പാലിക്കാൻ ആവശ്യപ്പെടുകയും ചെയ്തിട്ടുണ്ട്.

തബൂക്കിൽ റെക്കോർഡ് മഴയാണ് ഇന്ന് പെയ്തത്. കഴിഞ്ഞ 24 മണിക്കൂറിനുള്ളിൽ രാജ്യത്ത് ഏറ്റവും കൂടുതൽ മഴ രേഖപ്പെടുത്തിയത് തബൂക്ക് മേഖലയിലാണ്. തബൂക്ക് നഗരത്തിലെ അൽ-സുരൂർ നിരീക്ഷണ കേന്ദ്രത്തിൽ 118.5 മില്ലിമീറ്റർ മഴ രേഖപ്പെടുത്തി.

കനത്ത മഴയെത്തുടർന്ന് തബൂക്ക് പ്രവിശ്യയിലെ ഒരു റോഡിൽ മണ്ണിടിച്ചിലിനെ തുടർന്ന് വലിയ ഗർത്തം രൂപപ്പെട്ടു. അധികൃതർ ഉടൻ തന്നെ സ്ഥലത്തെത്തി മുൻകരുതൽ നടപടിയായി റോഡ് അടച്ചു. താൽക്കാലികമായി ഗതാഗതം വഴിതിരിച്ചുവിട്ട അധികൃതർ, റോഡ് പുനർനിർമ്മിക്കാനുള്ള പ്രവർത്തനങ്ങൾ തുടരുകയാണെന്ന് അറിയിച്ചു.

പരിസ്ഥിതി, ജല, കൃഷി മന്ത്രാലയത്തിൻ്റെ റിപ്പോർട്ട് അനുസരിച്ച്, മദീന, തബൂക്ക്, വടക്കൻ അതിർത്തികൾ, അൽ-ജൗഫ് എന്നീ നാല് മേഖലകളിലെ 47 നിരീക്ഷണ കേന്ദ്രങ്ങളിൽ മഴ രേഖപ്പെടുത്തി.

കൂടാതെ, വടക്കൻ അതിർത്തി മേഖലയിലെ തുറൈഫ്, അൽ-ജൗഫ് മേഖലയിലെ ഖുറയ്യാത്ത് എന്നിവിടങ്ങളിലും മഴ ലഭിച്ചു.സിവിൽ ഡിഫൻസ് പൗരന്മാരോടും താമസക്കാരോടും സന്ദർശകരോടും ജാഗ്രത പാലിക്കാൻ അഭ്യർത്ഥിച്ചു.

താഴ്വാരങ്ങൾ, മലവെള്ളപ്പാച്ചിൽ സാധ്യതയുള്ള സ്ഥലങ്ങൾ എന്നിവിടങ്ങളിൽ നിന്ന് അകലം പാലിക്കണം. ഒഴുകുന്ന വെള്ളക്കെട്ടുകൾ മുറിച്ചുകടക്കാനോ അവിടേക്ക് ഇറങ്ങാനോ സാഹസികത കാണിക്കരുത്. കൂടാതെ, ഗ്രാമങ്ങളിലെയും പ്രവിശ്യകളിലെയും കാർഷിക റോഡുകളിലൂടെയുള്ള യാത്ര ഒഴിവാക്കണം. സിവിൽ ഡിഫൻസിൻ്റെ നിർദ്ദേശങ്ങൾ കർശനമായി പാലിക്കണമെന്നും അധികൃതർ ആവശ്യപ്പെട്ടു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa