സൗദിയും ഇന്ത്യയും തമ്മിൽ പുതിയ കരാർ; ഡിപ്ലോമാറ്റിക്, സ്പെഷ്യൽ പാസ്പോർട്ട് ഉടമകൾക്ക് ഇനി വിസയില്ലാതെ യാത്ര ചെയ്യാം
റിയാദ്: സൗദി അറേബ്യയും ഇന്ത്യയും തമ്മിലുള്ള ഉഭയകക്ഷി ബന്ധം കൂടുതൽ ശക്തമാക്കുന്നതിന്റെ ഭാഗമായി പുതിയ വിസ കരാർ ഒപ്പിട്ടു.
ഇരുരാജ്യങ്ങളിലെയും ഡിപ്ലോമാറ്റിക്, സ്പെഷ്യൽ, ഒഫീഷ്യൽ പാസ്പോർട്ട് കൈവശമുള്ളവർക്ക് ഹ്രസ്വകാല താമസത്തിനായി വിസയില്ലാതെ യാത്ര ചെയ്യാൻ അനുവദിക്കുന്നതാണ് ഈ കരാർ.
ബുധനാഴ്ച റിയാദിൽ നടന്ന ചടങ്ങിൽ സൗദി വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാന് വേണ്ടി പ്രോട്ടോക്കോൾ കാര്യങ്ങൾക്കായുള്ള ഡെപ്യൂട്ടി വിദേശകാര്യ മന്ത്രി അബ്ദുൽ മജീദ് അൽ-സ്മാരിയും, സൗദിയിലെ ഇന്ത്യൻ അംബാസഡർ ഡോ. സുഹൈൽ അജാസ് ഖാനും ചേർന്നാണ് കരാറിൽ ഒപ്പുവെച്ചത്.
ഈ പുതിയ കരാർ പ്രകാരം ഇരുരാജ്യങ്ങളിലെയും ഔദ്യോഗിക പദവികൾ വഹിക്കുന്നവർക്ക് വിസ നടപടിക്രമങ്ങളില്ലാതെ എളുപ്പത്തിൽ യാത്രകൾ നടത്താൻ സാധിക്കും.
ഇത് നയതന്ത്ര മേഖലയിലെ സഹകരണം മെച്ചപ്പെടുത്താനും ഔദ്യോഗിക തലത്തിലുള്ള സന്ദർശനങ്ങൾ വേഗത്തിലാക്കാനും സഹായിക്കും. ഇന്ത്യയും സൗദി അറേബ്യയും തമ്മിൽ നിലനിൽക്കുന്ന തന്ത്രപ്രധാനമായ പങ്കാളിത്തത്തിന്റെ മറ്റൊരു സുപ്രധാന നാഴികക്കല്ലായി ഈ കരാർ വിലയിരുത്തപ്പെടുന്നു.
സാധാരണ പാസ്പോർട്ട് ഉടമകൾക്ക് നിലവിലുള്ള വിസ നിയമങ്ങളിൽ മാറ്റമൊന്നുമില്ലെങ്കിലും, ഔദ്യോഗിക തലത്തിലുള്ള ഈ നീക്കം ഇരുരാജ്യങ്ങളും തമ്മിലുള്ള സൗഹൃദത്തിന്റെ ആഴം വർദ്ധിപ്പിക്കുന്നതാണ്.
അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa