ഇറാനെ ആക്രമിക്കാൻ ഇന്ത്യൻ പോർട്ടുകൾ യുഎസ് നാവിക സേനക്ക് വിട്ടുനല്കിയിട്ടില്ലെന്ന് വിദേശ കാര്യ മന്ത്രാലയം; പ്രചരിക്കുന്നത് വ്യാജ വാർത്ത

ഇറാനെതിരായ സൈനിക നീക്കങ്ങൾക്കായി അമേരിക്കൻ നാവികസേന ഇന്ത്യൻ തുറമുഖങ്ങൾ ഉപയോഗിക്കുന്നുണ്ടെന്ന തരത്തിൽ പ്രചരിക്കുന്ന വാർത്തകൾ കേന്ദ്ര വിദേശകാര്യ മന്ത്രാലയം പൂർണ്ണമായും തള്ളി.

യുഎസ് പ്രതിരോധ സെക്രട്ടറിയുടെ മുൻ ഉപദേഷ്ടാവായ ഡഗ്ലസ് മഗ്രിഗർ നടത്തിയ ഈ അവകാശവാദങ്ങൾ തികച്ചും വ്യാജവും തെറ്റുമാണെന്ന് വിദേശകാര്യ മന്ത്രാലയം ഔദ്യോഗിക പ്രസ്താവനയിലൂടെ അറിയിച്ചു.

അമേരിക്ക ആസ്ഥാനമായുള്ള തീവ്രവലതുപക്ഷ ചാനലായ ‘വൺ അമേരിക്ക ന്യൂസ് നെറ്റ്‌വർക്കിൽ’ വന്ന റിപ്പോർട്ടുകൾ അടിസ്ഥാനരഹിതമാണെന്ന് ഇന്ത്യ വ്യക്തമാക്കി. ഇത്തരം കെട്ടിച്ചമച്ച പ്രസ്താവനകൾക്കെതിരെ ജാഗ്രത പാലിക്കണമെന്ന് ഇന്ത്യ മുന്നറിയിപ്പ് നൽകുകയും ചെയ്തു.

ഇന്ത്യ ആതിഥേയത്വം വഹിച്ച നാവിക അഭ്യാസത്തിന് ശേഷം മടങ്ങുകയായിരുന്ന ഇറാനിയൻ യുദ്ധക്കപ്പലിന് നേരെ ശ്രീലങ്കൻ തീരത്ത് സബ്മറൈൻ ആക്രമണം ഉണ്ടായ പശ്ചാത്തലത്തിലാണ് ഇന്ത്യയുടെ ഈ കർശനമായ പ്രതികരണം വന്നത്.

മേഖലയിലെ സമാധാനാന്തരീക്ഷം തകർക്കുന്ന തരത്തിലുള്ള തെറ്റായ വിവരങ്ങൾ പ്രചരിപ്പിക്കുന്നതിനെതിരെ ഇന്ത്യ ശക്തമായ വിയോജിപ്പ് പ്രകടിപ്പിച്ചു. അമേരിക്കൻ സൈനിക നീക്കങ്ങൾക്ക് ഇന്ത്യൻ മണ്ണ് വിട്ടുനൽകിയിട്ടില്ലെന്നും രാജ്യത്തിന്റെ നയതന്ത്ര നിലപാടുകളിൽ മാറ്റമില്ലെന്നും മന്ത്രാലയം ആവർത്തിച്ചു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa