ഡ്രൈവിംഗിനിടെ മേക്കപ്പും ഭക്ഷണവും വേണ്ട; കർശന നിർദ്ദേശവുമായി സൗദി ട്രാഫിക് വിഭാഗം

റിയാദ്: വാഹനമോടിക്കുമ്പോൾ ഡ്രൈവർമാരുടെ ശ്രദ്ധ റോഡിൽ നിന്ന് വ്യതിചലിക്കുന്നത് തടയാൻ കർശനമായ ബോധവൽക്കരണവുമായി സൗദി അറേബ്യയിലെ ട്രാഫിക് ജനറൽ ഡയറക്ടറേറ്റ് (മൊറൂർ).

വാഹനമോടിക്കുന്നതിനിടയിൽ ശ്രദ്ധ തിരിക്കുന്ന ഏതൊരു പ്രവൃത്തിയും ഭീകരമായ പ്രത്യാഘാതങ്ങൾക്കും അപ്രതീക്ഷിതമായ അപകടങ്ങൾക്കും വഴിതെളിക്കുമെന്ന് ഔദ്യോഗിക പ്ലാറ്റ്‌ഫോമുകളിലൂടെ പുറത്തുവിട്ട അറിയിപ്പിൽ ട്രാഫിക് വിഭാഗം വ്യക്തമാക്കി.

സാധാരണയായി കണ്ടുവരുന്ന മൊബൈൽ ഫോൺ ഉപയോഗം മാത്രമല്ല ഡ്രൈവിംഗിലെ അശ്രദ്ധയ്ക്ക് കാരണമാകുന്നത്. മറിച്ച്, വാഹനമോടിക്കുന്നതിനിടയിലെ ഭക്ഷണപാനീയങ്ങളുടെ ഉപയോഗം, കണ്ണാടി നോക്കിയുള്ള മേക്കപ്പ് അല്ലെങ്കിൽ അലങ്കാരങ്ങൾ എന്നിവയെല്ലാം ഡ്രൈവറുടെ പ്രതികരണ ശേഷി കുറയ്ക്കുന്ന ഗുരുതരമായ പിഴവുകളാണെന്ന് അധികൃതർ ചൂണ്ടിക്കാട്ടി.

സ്റ്റിയറിംഗിന് പിന്നിലിരിക്കുമ്പോഴുള്ള പൂർണ്ണമായ ഏകാഗ്രതയാണ് ഡ്രൈവറുടെയും യാത്രക്കാരുടെയും ഒപ്പം റോഡിലൂടെ പോകുന്ന മറ്റുള്ളവരുടെയും സുരക്ഷയ്ക്ക് അടിസ്ഥാനമെന്ന് അധികൃതർ ഓർമ്മിപ്പിച്ചു.

റോഡിലെ പെട്ടെന്നുള്ള മാറ്റങ്ങൾ തിരിച്ചറിയുന്നതിനും ഉചിതമായ തീരുമാനങ്ങൾ എടുക്കുന്നതിനും ഇത്തരം അശ്രദ്ധകൾ തടസ്സമാകുന്നു. “നിങ്ങളുടെ സുരക്ഷ ഞങ്ങൾക്ക് പ്രധാനം” എന്ന സന്ദേശം ഉയർത്തിപ്പിടിച്ചാണ് ട്രാഫിക് വിഭാഗം ഈ നിർദ്ദേശങ്ങൾ പുറപ്പെടുവിച്ചിരിക്കുന്നത്.

നിയമലംഘനങ്ങളും അതുവഴിയുണ്ടാകുന്ന ജീവഹാനിയും കുറയ്ക്കുന്നതിനായി എല്ലാവരും ട്രാഫിക് നിയമങ്ങൾ കർശനമായി പാലിക്കണമെന്നും ഡ്രൈവിംഗിനിടെ ശ്രദ്ധ തിരിക്കുന്ന എല്ലാ സാഹചര്യങ്ങളിൽ നിന്നും വിട്ടുനിൽക്കണമെന്നും ട്രാഫിക് ജനറൽ ഡയറക്ടറേറ്റ് ആവശ്യപ്പെട്ടു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa