ചർച്ച പരാജയം; അമേരിക്കയുടെ നിബന്ധനകൾ തള്ളി ഇറാൻ; അടുത്ത ഘട്ടം അനിശ്ചിതത്വത്തിൽ

പശ്ചിമേഷ്യയിൽ സമാധാനം പുനഃസ്ഥാപിക്കാനുള്ള നയതന്ത്ര നീക്കങ്ങൾക്ക് വൻ തിരിച്ചടിയായി, പാകിസ്ഥാൻ തലസ്ഥാനമായ ഇസ്‌ലാമാബാദിൽ നടന്ന നിർണ്ണായകമായ അമേരിക്ക-ഇറാൻ ചർച്ചകൾ പരാജയപ്പെട്ടു.

21 മണിക്കൂർ നീണ്ടുനിന്ന മാരത്തോൺ ചർച്ചകൾക്കൊടുവിലും സുപ്രധാന വിഷയങ്ങളിൽ ധാരണയിലെത്താൻ സാധിക്കാതെ വന്നതോടെ, സമാധാന നീക്കങ്ങൾ ഉടമ്പടിയില്ലാതെ പിരിഞ്ഞു.

വാഷിംഗ്ടൺ മുന്നോട്ടുവെച്ച നിബന്ധനകൾ അംഗീകരിക്കാൻ ഇറാൻ തയ്യാറായില്ലെന്ന് ചുരുങ്ങിയ വാക്കുകളിൽ നടത്തിയ വാർത്താ സമ്മേളനത്തിൽ അമേരിക്കൻ വൈസ് പ്രസിഡന്റ് ജെ.ഡി. വാൻസ് വ്യക്തമാക്കി.

അതേസമയം, ചർച്ചാ മേശയിൽ നിന്ന് പിന്മാറാൻ അമേരിക്ക മനഃപൂർവ്വം ഒഴികഴിവുകൾ കണ്ടെത്തുകയായിരുന്നുവെന്ന് ഇറാൻ പ്രതിനിധി സംഘത്തോടടുത്ത വൃത്തങ്ങൾ പറഞ്ഞു.

യുദ്ധക്കളത്തിൽ സംഭവിച്ച പരാജയത്തിന് പിന്നാലെ അന്താരാഷ്ട്ര തലത്തിൽ നഷ്ടപ്പെട്ട മുഖം രക്ഷിക്കാനാണ് അമേരിക്ക ചർച്ചയ്ക്ക് വന്നതെന്നും, എന്നാൽ തങ്ങളുടെ അമിതമായ ആവശ്യങ്ങളിൽ മാറ്റം വരുത്താൻ അവർ തയ്യാറായില്ലെന്നും ഇറാൻ ആരോപിച്ചു.

യുദ്ധത്തിലൂടെ നേടിയെടുക്കാൻ കഴിയാത്ത കാര്യങ്ങൾ ചർച്ചകളിലൂടെ നേടിയെടുക്കാനാണ് അമേരിക്ക ശ്രമിച്ചതെന്ന് ഇറാൻ വൃത്തങ്ങൾ ചൂണ്ടിക്കാട്ടി.

ചർച്ചകളുടെ അടുത്ത ഘട്ടത്തെക്കുറിച്ച് നിലവിൽ യാതൊരു പദ്ധതിയുമില്ലെന്ന് ഇറാൻ വ്യക്തമാക്കിയിട്ടുണ്ട്. അമേരിക്കയുടെ ഭാഗത്തുനിന്ന് യുക്തിസഹമായ സമീപനം ഉണ്ടാകാത്ത പക്ഷം ഇനി ചർച്ചകൾക്ക് പ്രസക്തിയില്ലെന്നാണ് ഇറാന്റെ നിലപാട്.

രണ്ടാഴ്ചത്തെ താൽക്കാലിക വെടിനിർത്തൽ അവസാനിക്കാനിരിക്കെ ചർച്ചകൾ പരാജയപ്പെട്ടത് പശ്ചിമേഷ്യയെ വീണ്ടും യുദ്ധഭീതിയിലാഴ്ത്തിയിരിക്കുകയാണ്.

ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ഇറാനെതിരെ ആക്രമണ ഭീഷണി തുടരുന്ന സാഹചര്യത്തിൽ, ഈ നയതന്ത്ര പരാജയം മേഖലയിലെ സുരക്ഷാ സ്ഥിതി കൂടുതൽ വഷളാക്കിയേക്കും.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
Arabian Malayali WhatsApp Group