സമാധാന ചർച്ചകൾക്കിടെ നെതന്യാഹുവിന്റെ യുദ്ധഭീഷണി; ഇറാനെ വീണ്ടും ആക്രമിക്കുമെന്ന് മുന്നറിയിപ്പ്

ഇറാനിലെ ഭരണകൂടത്തിനും അവരുടെ സായുധ സഖ്യകക്ഷികൾക്കുമെതിരായ സൈനിക നടപടികൾ ഇസ്രായേൽ തുടരുമെന്ന് പ്രധാനമന്ത്രി ബെഞ്ചമിൻ നെതന്യാഹു.

തന്റെ നേതൃത്വത്തിലുള്ള ഇസ്രായേൽ ഇറാനെതിരെ വിട്ടുവീഴ്ചയില്ലാത്ത പോരാട്ടം തുടരുമെന്ന് നെതന്യാഹു വ്യക്തമാക്കി. ഇറാനെതിരായ ഇസ്രായേലിന്റെ സൈനിക നീക്കങ്ങൾ അവസാനിച്ചിട്ടില്ലെന്ന് അദ്ദേഹം ആവർത്തിച്ചു.

പാകിസ്ഥാനിൽ വെച്ച് നിർണ്ണായകമായ യുഎസ്-ഇറാൻ ചർച്ചകൾ നടക്കുമ്പോഴാണ് സമാധാന ശ്രമങ്ങൾക്ക് തിരിച്ചടിയാകുന്ന വിധത്തിൽ നെതന്യാഹു പ്രസ്താവന നടത്തിയത്.

ഇറാനെ പിന്തുണയ്ക്കുന്നുവെന്ന് ആരോപിച്ച് തുർക്കി പ്രസിഡന്റ് റജബ് ത്വയ്യിബ് ഉർദുഗാനെതിരെയും നെതന്യാഹു രൂക്ഷവിമർശനം ഉന്നയിച്ചു. ഉർദുഗാൻ ഇറാനെ വഴിവിട്ട് സഹായിക്കുകയാണെന്നും കുർദിഷ് വംശജരെ കൂട്ടക്കൊല ചെയ്യുന്നതിന് അദ്ദേഹം ഉത്തരവാദിയാണെന്നും നെതന്യാഹു ആരോപിച്ചു.

ഇതുവരെ ഇറാനെതിരെ ചരിത്രപരമായ നേട്ടങ്ങളാണ് ഇസ്രായേൽ കൈവരിച്ചിട്ടുള്ളത്. “ഞങ്ങൾ അവരെ പ്രഹരിച്ചു, എങ്കിലും ഞങ്ങൾക്ക് ഇനിയും ഒരുപാട് കാര്യങ്ങൾ ചെയ്യാനുണ്ട്,” അദ്ദേഹം കൂട്ടിച്ചേർത്തു.

ഗാസയിലെ യുദ്ധക്കുറ്റങ്ങളുടെ പേരിൽ അന്താരാഷ്ട്ര ക്രിമിനൽ കോടതി അറസ്റ്റ് വാറണ്ട് പുറപ്പെടുവിച്ചിട്ടുള്ള വ്യക്തിയാണ് നെതന്യാഹു എന്നത് ശ്രദ്ധേയമാണ്.

ഇതോടെ മേഖലയിലെ താൽക്കാലിക വെടിനിർത്തൽ എത്രത്തോളം സുരക്ഷിതമാണെന്ന കാര്യത്തിൽ അന്താരാഷ്ട്ര തലത്തിൽ ആശങ്കകൾ ഉയരുന്നുണ്ട്. നെതന്യാഹുവിന്റെ ഈ പുതിയ നിലപാട് പശ്ചിമേഷ്യയിലെ നയതന്ത്ര നീക്കങ്ങളെ കൂടുതൽ സങ്കീർണ്ണമാക്കിയേക്കാം.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
Arabian Malayali WhatsApp Group