ഇറാന്റെ മരവിപ്പിച്ച ഫണ്ടുകൾ അടിയന്തരമായി റിലീസ് ചെയ്യും; യുഎസുമായുള്ള ധാരണാപത്രത്തിൽ ഒപ്പുവെക്കാൻ ഇറാൻ ഒരുങ്ങുന്നു

അമേരിക്കയുമായി ധാരണാപത്രത്തിൽ ഒപ്പുവെക്കാൻ ടെഹ്‌റാൻ തീരുമാനിക്കുകയാണെങ്കിൽ, വിവിധ വിദേശ ബാങ്കുകളിലായി അമേരിക്ക മരവിപ്പിച്ചു നിർത്തിയിരിക്കുന്ന ഇറാന്റെ ഫണ്ടുകളിൽ ഒരു പങ്ക് അടിയന്തരമായി റിലീസ് ചെയ്യുമെന്ന് റിപ്പോർട്ട്. ബാക്കിയുള്ള തുക ഘട്ടം ഘട്ടമായി വിട്ടുനൽകുകയും ചെയ്യും.

അമേരിക്കയും ഇറാനും തമ്മിലുള്ള ഉപരോധം നീക്കൽ ഉൾപ്പെടെയുള്ള നിർണായക വിഷയങ്ങൾ ധാരണാപത്രം ഒപ്പുവെച്ചതിനും 60 ദിവസത്തെ സമാധാന ചർച്ചകൾക്കും ശേഷം മാത്രമേ പരിഗണിക്കുകയുള്ളൂവെന്ന് ഇറാന്റെ ഔദ്യോഗിക വാർത്താ ഏജൻസിയായ ‘ഇർന’ റിപ്പോർട്ട് ചെയ്തു.

നിലവിലെ കടുത്ത സൈനിക സംഘർഷങ്ങൾക്കിടയിലും നയതന്ത്ര ചർച്ചകൾക്കായുള്ള പുതിയ വാതിലുകൾ തുറക്കുന്നതാണ് ഈ നീക്കം.

നിലവിലുണ്ടാക്കുന്ന ധാരണാപത്രത്തിൽ ആണവ പദ്ധതികളുമായി ബന്ധപ്പെട്ട് ഇറാൻ യാതൊരുവിധ പ്രതിജ്ഞാബദ്ധതയും നൽകുന്നില്ല. അതുപോലെ തന്നെ അമേരിക്ക ഇറാന് മേലുള്ള സാമ്പത്തിക ഉപരോധങ്ങൾ നീക്കം ചെയ്യുമെന്ന കാര്യത്തിലും ഈ ഘട്ടത്തിൽ ഉറപ്പ് നൽകുന്നില്ല.

മേഖലയിൽ ശാശ്വത സമാധാനം കൊണ്ടുവരുന്നതിനുള്ള അന്തിമ ചർച്ചകൾ പൂർത്തിയാക്കാൻ ഇരുവിഭാഗത്തിനും 60 ദിവസത്തെ സമയപരിധിയാണ് നിശ്ചയിച്ചിരിക്കുന്നത്.

ഹോർമുസ് കടലിടുക്കിലെ നാവിക യുദ്ധത്തിനും അമേരിക്കൻ ബോംബാക്രമണങ്ങൾക്കും പിന്നാലെ ഇരുരാജ്യങ്ങളും കടുത്ത നിലപാടുകളിൽ തന്നെ തുടരുമ്പോഴും, അണിയറയിൽ പാകിസ്താന്റെയും ഖത്തറിന്റെയും മധ്യസ്ഥതയിൽ സമാധാന ചർച്ചകൾ സജീവമാണെന്നാണ് ഈ റിപ്പോർട്ട് വ്യക്തമാക്കുന്നത്.

മരവിപ്പിച്ച ഫണ്ടുകൾ തിരികെ ലഭിക്കുന്നത് സാമ്പത്തിക പ്രതിസന്ധി നേരിടുന്ന ഇറാന് വലിയ ആശ്വാസമാകുമെങ്കിലും, ഉപരോധങ്ങൾ പൂർണ്ണമായി നീക്കുന്ന കാര്യത്തിൽ 60 ദിവസത്തെ ചർച്ചകൾക്ക് ശേഷമേ വ്യക്തത വരികയുള്ളൂ.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
Arabian Malayali WhatsApp Group