കിട്ടിയ ജോലി ചെയ്യാനാകാതെ കുഴപ്പത്തിലായ തമിഴ്‌നാടുകാരൻ, സാമൂഹ്യപ്രവർത്തകരുടെ സഹായത്തോടെ തിരികെ മടങ്ങി.

ദമ്മാമിലെ ഒരു കമ്പനിയിൽ ഹെവി ഡ്രൈവർ ആയിട്ടാണ് അശോക് കുമാർ വന്നത്. എന്നാൽ ജീവിതത്തിൽ ആദ്യമായി കാണുന്ന വലിയ വാഹനങ്ങൾ ഓടിയ്ക്കാൻ ഉള്ള ധൈര്യം അയാൾക്ക് ഉണ്ടായില്ല. തന്നെ തിരികെ അയയ്ക്കണമെന്ന് അയാൾ ആവശ്യപ്പെട്ടെങ്കിലും സ്പോൺസർ വഴങ്ങിയില്ല. മാത്രമല്ല, ജോലി ഉറപ്പ് ഇല്ലാത്തതിനാൽ അശോക് കുമാറിന്റെ ഇക്കാമയും കമ്പനി എടുത്തില്ല. തുടർന്ന് അയാൾ ഇന്ത്യൻ എംബസ്സിയെ ബന്ധപ്പെട്ട് സഹായം അഭ്യർത്ഥിച്ചു. എംബസ്സി നാട്ടിലുള്ള ട്രാവൽ ഏജൻസിയെ ബന്ധപ്പെട്ട് വിശദീകരണം ചോദിച്ചു. ട്രാവൽ ഏജന്റ്  ജുബൈൽ ഇസ്ലാമിക്ക് സെന്റർ സാമൂഹ്യപ്രവർത്തകനായ യാസിറിനെ ബന്ധപ്പെട്ട് ഈ കേസിൽ ഇടപെടാൻ അഭ്യർത്ഥിച്ചു. യാസിർ  നവയുഗം ജീവകാരുണ്യവിഭാഗം കൺവീനർ ഷിബു കുമാറിനെ ബന്ധപ്പെട്ട് ഈ കേസിന്റെ വിവരങ്ങൾ കൈമാറി. 

തുടർന്ന് ഷിബുകുമാറും യാസിറും സ്പോൺസറുമായി നടത്തിയ ദീർഘമായ ഒത്തുതീർപ്പ് ചർച്ചകൾക്ക് ഒടുവിൽ അശോക് കുമാറിന് എക്സിറ്റ് വിസ അടിച്ചു നൽകാമെന്ന് സ്പോൺസർ സമ്മതിച്ചു. പകരം, സ്പോൺസറിന് പുതിയ ഹെവിഡ്രൈവറെ റിക്രൂട്ട് ചെയ്ത് നൽകാമെന്ന് ട്രാവൽ ഏജന്റും സമ്മതിച്ചു.