സൗദിയിൽ ഇന്ന് (ശനി) ജോലി ചെയ്യുന്ന ഒരു തൊഴിലാളിക്ക് തൊഴിലുടമ വേതനം നൽകേണ്ടത് എപ്രകാരം? വിശദമായി അറിയാം

ഇന്ന്, ഫെബ്രുവരി-22-ശനിയാഴ്ച സൗദി സ്ഥാപക ദിനത്തോടനുബന്ധിച്ച് സൗദിയിൽ പൊതു അവധി പ്രഖ്യാപിച്ചിരിക്കുകയാണല്ലോ? ഈ വർഷത്തെ സ്ഥാപക ദിനം ശനിയാഴ്ച ആയതിനാൽ, ശനിയാഴ്ച വാരാന്ത്യ അവധി നൽകുന്ന സ്ഥാപനങ്ങളിലെ ജീവനക്കാർക്ക് ഞായറാഴ്ച കൂടി അവധി ലഭിക്കും എന്നത് ശ്രദ്ധേയമാണ്. ചുരുക്കത്തിൽ നിരവധി ആളുകൾക്ക് വെള്ളി, ശനി, ഞായർ എന്നീ ദിനങ്ങൾ അവധിയായിരിക്കും എന്ന് സാരം.

അതേ സമയം ചില മേഖലകളിലെ ജീവനക്കാർക്ക് ഇന്ന് പൊതു അവധിയാണെങ്കിൽ പോലും ജോലി ചെയ്യേണ്ടതായി വരും എന്നത് തീർച്ചയാണ്. അത്തരം ജീവനക്കാർക്ക് വേതനം നൽകേണ്ടത് അല്ലെങ്കിൽ നഷ്ടപരിഹാരം നൽകേണ്ടത് എപ്രകാരമാണെന്ന് സൗദി തൊഴിൽ നിയമത്തിൽ വ്യക്തമായി പറയുന്നുണ്ട്. ഇന്ന് ജോലി ചെയ്യുന്ന ഒരു തൊഴിലാളിക്ക് രണ്ട് രീതിയിൽ നഷ്ടപരിഹാരം നൽകാൻ തൊഴിലുടമക്ക് സാധിക്കും. അവ താഴെ വ്യക്തമാക്കുന്നു.

കഴിഞ്ഞ ദിവസം നിലവിൽ വന്ന പുതിയ തൊഴിൽ നിയമ ഭേദഗതി പ്രകാരം ഒരു തൊഴിലാളി ഓവർടൈം ജോലി ചെയ്താൽ നൽകേണ്ട ഓവർ ടൈം മണിക്ക് പകരം, ആവശ്യമെങ്കിൽ ശമ്പളത്തോടുകൂടിയ അവധി നൽകാവുന്നതാണ്. എന്നാൽ ഇത് തൊഴിൽ കരാറിൽ പരാമർശിക്കണം എന്നാണ് വ്യവസ്ഥ.

അല്ലെങ്കിൽ,  നേരത്തെ ഉള്ള നിയമപ്രകാരം, ഇത്തരത്തിൽ അവധി ദിനത്തിൽ ജോലി ചെയ്യേണ്ടി വരുന്ന തൊഴിലാളിക്ക് ഓവർടൈം വേതനം നൽകൽ തൊഴിലുടമയുടെ മേൽ നിർബന്ധമാണ്.  അത് സംബന്ധിച്ച് കൂടുതൽകാര്യങ്ങൾ താഴെ ഉദാഹരണ സഹിതം വ്യക്തമാക്കുന്നു.

സൗദി ദേശീയ ദിനം, സ്ഥാപക ദിനം, പെരുന്നാളുകൾ, മറ്റു പൊതു അവധി ദിനങ്ങൾ – എന്നിങ്ങനെയുള്ള അവധി ദിനങ്ങളിൽ ജോലി ചെയ്യേണ്ടി വരുന്ന ഒരു തൊഴിലാളിക്ക് ഓരോ മണിക്കൂറും ഓവർ ടൈം ആയാണ് കണക്കാക്കപ്പെടുക. അത് കൊണ്ട് തന്നെ ഫുൾ സാലറിയെയും ബേസിക് സാലറിയുടെ പകുതി തുകയേയും ഓരോ മണിക്കൂറിലേക്കും എന്ന തോതിൽ വിഭജിച്ച് ലഭിക്കുന്ന തുക കൂട്ടുന്നതാണ് മണിക്കൂർ അടിസ്ഥാനത്തിൽ തൊഴിലാളിക്ക് വേതനമായി നൽകേണ്ടത്.

ഉദാഹരണത്തിനു, ഒരു തൊഴിലാളിയുടെ ഫുൾ സാലറി 4000 റിയാൽ ആണെങ്കിൽ 4000÷30÷8=(16.66) റിയാൽ ആയിരിക്കും അയാളുടെ ഒരു മണിക്കൂർ വേതനം. ഇനി കരാർ പ്രകാരമുള്ള അയാളുടെ ബേസിക് സാലറി 2000 റിയാൽ ആണെങ്കിൽ 2000÷2÷30÷8=(4.16) റിയാൽ ആയിരിക്കും അയാളുടെ ഒരു മണിക്കൂർ ബേസിക് സാലറി ഓവർടൈം മണി. ചുരുക്കത്തിൽ അയാൾക്ക് ഓരോ മണിക്കൂറിനും 16.66+4.16 = (20.82) റിയാൽ എന്ന തോതിൽ  അവധി ദിനത്തിൽ ജോലി ചെയ്താൽ വേതനം ലഭിക്കണം എന്ന് സാരം.

ഈ അധിക തുക അവധി ദിനത്തിൽ ജോലി ചെയ്യുന്ന തൊഴിലാളിക്ക് ലഭിക്കേണ്ട അവകാശമാണെന്നോർക്കുക. ഇത്തരത്തിൽ അവധി ദിനങ്ങളിൽ ഓവർടൈം ജോലി ചെയ്യേണ്ട സാഹചര്യമുണ്ടെങ്കിൽ അത് തൊഴിലാളിയെ രേഖാമൂലം അറിയിച്ചിരിക്കണമെന്നതും തൊഴിൽ നിയമത്തിലെ വ്യവസ്ഥയാണ്.
✍️ജിഹാദുദ്ദീൻ അരീക്കാടൻ

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa