ഓടിക്കൊണ്ടിരിക്കെ വാഹനത്തിന്റെ ടയർ പൊട്ടിയാൽ എന്തുചെയ്യണം? സൗദി റോഡ് അതോറിറ്റിയുടെ ആറ് മാർഗനിർദേശങ്ങൾ അറിയാം

ഈദുൽ ഫിത്തർ അവധിക്കാലത്തിന് മുന്നോടിയായി “സുരക്ഷിത അവധി” എന്ന ബോധവത്കരണ കാമ്പയ്നിന്റെ ഭാഗമായി, ടയർ പൊട്ടിയാൽ സ്വീകരിക്കേണ്ട 6 മാർഗ്ഗനിർദ്ദേശങ്ങൾ ജനറൽ അതോറിറ്റി ഫോർ റോഡ്സ് വ്യക്തമാക്കി.

പരിഭ്രാന്തരാകരുത്, ടയർ പൊട്ടുമ്പോൾ ശാന്തത പാലിക്കുക എന്നതാണ് ഏറ്റവും പ്രധാനം. പരിഭ്രമം വാഹനത്തിന്റെ നിയന്ത്രണം നഷ്ടപ്പെടുത്താൻ ഇടയാക്കും.

പെട്ടെന്ന് ബ്രേക്ക് ചവിട്ടരുത്, പെട്ടെന്ന് ബ്രേക്ക് ഉപയോഗിക്കുന്നത് വാഹനത്തെ കൂടുതൽ വലിയ അപകടത്തിലേക്ക് നയിക്കും. പകരം സാവധാനം വേഗത കുറയ്ക്കുക.

സ്റ്റിയറിങ് വീൽ ഉറപ്പായി പിടിക്കുക, ടയർ പൊട്ടിയാൽ വാഹനം വശങ്ങളിലേക്ക് വലിക്കാൻ സാധ്യതയുണ്ട്. സ്റ്റിയറിങ് ഉറച്ച് പിടിച്ച് വാഹനം നേർരേഖയിൽ നിലനിർത്താൻ ശ്രമിക്കുക.

വേഗത ക്രമേണ കുറയ്ക്കുക, ആക്സിലറേറ്ററിൽ നിന്ന് കാൽ എടുത്ത് വാഹനം സ്വാഭാവികമായി മന്ദഗതിയിലാകാൻ അനുവദിക്കുക.

സുരക്ഷിതമായി ഒതുക്കുക, റോഡിന്റെ വശത്തേക്ക് സുരക്ഷിതമായി വാഹനം ഒതുക്കി നിർത്തുക. ഹസാർഡ് ലൈറ്റുകൾ ഓൺ ചെയ്യാൻ മറക്കരുത്.

വാഹനം പരിശോധിക്കുക, ടയർ മാറ്റുന്നതിന് മുമ്പ് വാഹനത്തിന്റെ മറ്റ് ഭാഗങ്ങൾക്ക് കേടുപാടുകൾ സംഭവിച്ചിട്ടുണ്ടോ എന്ന് പരിശോധിക്കുക.

ഈദ് അവധിക്കാലത്ത് യാത്രകൾ കൂടുതലായതിനാൽ അപകട സാധ്യതയും ഉയരുന്നു. ഇതിന്റെ പശ്ചാത്തലത്തിലാണ് ജനറൽ അതോറിറ്റി ഫോർ റോഡ്സ് ഈ ബോധവത്കരണ പരിപാടി ആരംഭിച്ചത്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa