സൗദിയുടെ മിക്ക മേഖലകളിലും ശക്തമായ കാറ്റും മഴയും പൊടിക്കാറ്റും; ജാഗ്രതാ നിർദ്ദേശം

റിയാദ്: സൗദി അറേബ്യയുടെ വിവിധ പ്രവിശ്യകളിൽ ഇന്ന് ശക്തമായ കാലാവസ്ഥാ മാറ്റങ്ങൾക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. ശക്തമായ കാറ്റ്, പൊടിക്കാറ്റ്, വ്യത്യസ്ത തീവ്രതയിലുള്ള മഴ എന്നിവ ഉൾപ്പെടെയുള്ള പ്രതികൂല കാലാവസ്ഥാ സാഹചര്യങ്ങൾ മിക്ക പ്രദേശങ്ങളെയും ബാധിച്ചേക്കാം.

റിയാദ് മേഖലയിലെ വിവിധ പ്രദേശങ്ങളിൽ ശക്തമായ കാറ്റ് വീശാനും ഇത് പൊടിക്കാറ്റിന് കാരണമാകാനും സാധ്യതയുണ്ട്. രാവിലെ 10:00 മുതൽ രാത്രി 9:00 വരെ ദൃശ്യപരത 3 മുതൽ 5 കിലോമീറ്റർ വരെയായി കുറയാൻ സാധ്യതയുണ്ടെന്ന് മുന്നറിയിപ്പിൽ പറയുന്നു.

കിഴക്കൻ പ്രവിശ്യയിലും പൊടിക്കാറ്റിന് സാധ്യതയുണ്ട്. ഉച്ചയ്ക്ക് 1:00 മുതൽ രാത്രി 8:00 വരെ പൊടിപടലങ്ങൾ നിറഞ്ഞ കാറ്റ് വീശാനും ദൂരക്കാഴ്ച കുറയാനും സാധ്യതയുണ്ടെന്ന് കാലാവസ്ഥാ നിരീക്ഷകർ പ്രവചിക്കുന്നു.

മദീന പ്രവിശ്യയിൽ ശക്തമായ കാറ്റ്, പൊടിക്കാറ്റ്, നേരിയ മഴ എന്നിവയ്ക്ക് സാധ്യതയുണ്ട്. ചിലയിടങ്ങളിൽ മണിക്കൂറിൽ 49 കിലോമീറ്റർ വരെ വേഗതയിൽ കാറ്റ് വീശാനും നേരിയ മഴയോടൊപ്പം ഇടിമിന്നലിനും സാധ്യതയുണ്ട്.

വടക്കൻ അതിർത്തി പ്രവിശ്യകളിൽ രാവിലെ 11:00 മുതൽ രാത്രി 8:00 വരെ ശക്തമായ കാറ്റും പൊടിക്കാറ്റും അനുഭവപ്പെടാൻ സാധ്യതയുണ്ട്. ചിലയിടങ്ങളിൽ ദൃശ്യപരത വളരെ കുറഞ്ഞേക്കാം.

മക്ക പ്രവിശ്യയിൽ നേരിയതും മിതമായതുമായ മഴയും ശക്തമായ കാറ്റും അനുഭവപ്പെടാൻ സാധ്യതയുണ്ട്. രാവിലെ 11:00 മുതൽ രാത്രി 9:00 വരെ വിവിധ സമയങ്ങളിൽ ശക്തമായ കാറ്റ് വീശാനും മഴ പെയ്യാനും സാധ്യതയുണ്ട്. ചില പ്രദേശങ്ങളിൽ പെട്ടെന്നുള്ള വെള്ളപ്പൊക്കം, ആലിപ്പഴ വർഷം, വളരെ കുറഞ്ഞ ദൃശ്യപരത എന്നിവയ്ക്കും സാധ്യതയുണ്ട്.

ജിസാൻ പ്രവിശ്യയിൽ ഉച്ചയ്ക്ക് 1:00 നും രാത്രി 8:00 നും ഇടയിൽ ശക്തമായ കാറ്റിനൊപ്പം നേരിയ മഴ പെയ്യാനും ഇത് ദൃശ്യപരത കുറയുന്നതിനും ഇടിമിന്നലിനും കാരണമാകാനും സാധ്യതയുണ്ട്.

അസീർ മേഖലയിൽ നേരിയതും മിതമായതുമായ മഴയ്ക്കും ശക്തമായ കാറ്റിനും സാധ്യതയുണ്ട്. രാവിലെ 11:00 മുതൽ രാത്രി 8:00 വരെ മഴയും ശക്തമായ കാറ്റും അനുഭവപ്പെട്ടേക്കാം. ചിലയിടങ്ങളിൽ ആലിപ്പഴം വീഴ്ച, വെള്ളപ്പൊക്കം, ഇടിമിന്നൽ എന്നിവയോടുകൂടിയ മഴയ്ക്കും സാധ്യതയുണ്ട്.

അൽ ബഹ പ്രവിശ്യയിൽ മിതമായ മഴയും ശക്തമായ കാറ്റും അനുഭവപ്പെടാൻ സാധ്യതയുണ്ട്. ചിലയിടങ്ങളിൽ ദൃശ്യപരത വളരെ കുറയാനും ആലിപ്പഴം വീഴ്ച, വെള്ളപ്പൊക്കം, ഇടിമിന്നൽ എന്നിവയ്ക്കും സാധ്യതയുണ്ട്. മറ്റു ചിലയിടങ്ങളിൽ നേരിയ മഴ പെയ്യാനും സാധ്യതയുണ്ട്.

നജ്‌റാനിലും അൽ ജൗഫ് മേഖലയി ശക്തമായ കാറ്റ് വീശാൻ സാധ്യതയുണ്ട്. രാവിലെ 9:00 മുതൽ വൈകുന്നേരം 4:00 വരെ മണിക്കൂറിൽ 40 മുതൽ 49 കിലോമീറ്റർ വരെ വേഗതയിൽ കാറ്റ് വീശാനും ദൃശ്യപരത കുറയാനും സാധ്യതയുണ്ട്.

ഈ അസ്ഥിരമായ കാലാവസ്ഥയിൽ പൊതുജനങ്ങൾ ജാഗ്രത പാലിക്കണമെന്നും ബന്ധപ്പെട്ട അധികാരികളുടെ നിർദ്ദേശങ്ങൾ അനുസരിക്കണമെന്നും കാലാവസ്ഥാ നിരീക്ഷണ കേന്ദ്രം അഭ്യർത്ഥിച്ചു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa