ഫലസ്തീനികളെ ലിബിയയിലേക്ക് നാടുകടത്താൻ നീക്കം; ട്രംപിന്റെ പുതിയ ഗാസ പദ്ധതി വിവാദത്തിൽ

ഗാസയിൽ നിന്ന് ഒരു ദശലക്ഷത്തോളം പലസ്തീനികളെ ലിബിയയിലേക്ക് നാടുകടത്താൻ ട്രംപ് ഭരണകൂടം പദ്ധതിയിടുന്നതായി എൻബിസി ന്യൂസ് റിപ്പോർട്ട് ചെയ്യുന്നു.

ഈ നീക്കം വംശീയ ഉന്മൂലനത്തിന് തുല്യമാകുമെന്ന ആരോപണങ്ങൾ ഉയരുന്നതിനിടെ, അമേരിക്കൻ ഭരണകൂടം ഇത് ലിബിയൻ നേതാക്കളുമായി ഇതിനകം ചർച്ച ചെയ്തതായും റിപ്പോർട്ടിൽ പറയുന്നു.

പലസ്തീൻ അഭയാർത്ഥികളെ സ്വീകരിക്കുന്നതിന് പകരമായി, നേരത്തെ മരവിപ്പിച്ച ശതകോടിക്കണക്കിന് ഡോളർ അമേരിക്ക ലിബിയക്ക് നൽകും.

ട്രംപ് ജനുവരിയിൽ അധികാരമേറ്റതുമുതൽ പലസ്തീനികളെ കൂട്ടമായി കുടിയൊഴിപ്പിക്കുന്നതിനുള്ള നിർദ്ദേശങ്ങളെ പിന്തുണയ്ക്കുന്നുണ്ട്.

എന്നാൽ പലസ്തീനികളെ കൂട്ടമായി കുടിയൊഴിപ്പിക്കുന്നതിനുള്ള ട്രംപിന്റെ പദ്ധതിക്കെതിരെ അറബ് രാജ്യങ്ങളടക്കം നിരവധി രാജ്യങ്ങൾ രംഗത്ത് വന്നിട്ടുണ്ട്.

ഈജിപ്ത്, ജോർദാൻ തുടങ്ങിയ രാജ്യങ്ങൾ പലസ്തീൻ അഭയാർത്ഥികളെ സ്വീകരിക്കാൻ വിസമ്മതിച്ചു. പലസ്തീൻ ജനതയുടെ പലായനത്തിന് നിർബന്ധപൂർവം ശ്രമിക്കുന്നത് മേഖലയിലെ സ്ഥിരതയെ തകർക്കുമെന്നും പല രാജ്യങ്ങളും മുന്നറിയിപ്പ് നൽകി.

പലസ്തീൻ അതോറിറ്റിയും ഹമാസും ഈ നീക്കത്തെ ശക്തമായി അപലപിച്ചു. ഇത് പലസ്തീൻ ജനതയുടെ അവകാശങ്ങൾക്കെതിരായ കടന്നുകയറ്റമാണെന്ന് അവർ പറഞ്ഞു.

അന്താരാഷ്ട്ര നിയമങ്ങൾക്കും മാനുഷിക പരിഗണനകൾക്കും എതിരാണ് ഈ പദ്ധതിയെന്ന് പല മനുഷ്യാവകാശ സംഘടനകളും കുറ്റപ്പെടുത്തിയിരുന്നു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa