സംഘർഷം അതിരൂക്ഷം; ഇസ്രായേലിൽ എട്ട് പേർ കൊല്ലപ്പെട്ടു, ഇറാനിലെ ആണവ കേന്ദ്രങ്ങളിലും എണ്ണ സംഭരണികളിലും ആക്രമണം

മിഡിൽ ഈസ്റ്റിൽ ഇസ്രായേലും ഇറാനും തമ്മിലുള്ള സംഘർഷം നിയന്ത്രണാതീതമായി തുടരുന്നു. കഴിഞ്ഞ രാത്രി മുഴുവൻ ഇരുരാജ്യങ്ങളും പരസ്പരം ആക്രമണങ്ങൾ അഴിച്ചുവിട്ടതോടെ മേഖലയിൽ യുദ്ധഭീതി ശക്തമായി.

ഇസ്രായേലിൽ ഇന്നലെ രാത്രി ഇറാൻ നടത്തിയ മിസൈൽ ആക്രമണങ്ങളിൽ പത്ത് പേർ കൊല്ലപ്പെട്ടതായി ഇസ്രായേൽ സ്ഥിരീകരിച്ചു.

ഇസ്രായേലിന് നേരെ പുതിയൊരു മിസൈൽ ആക്രമണ പരമ്പരയാണ് ഇറാൻ അഴിച്ചുവിട്ടത്. രാജ്യത്തിന്റെ മധ്യഭാഗത്തും വടക്കൻ പ്രദേശങ്ങളിലും ഈ ആക്രമണങ്ങൾ കനത്ത നാശനഷ്ടങ്ങൾ വരുത്തി.

ഇസ്രായേലിന്റെ അടിയന്തര സർവീസ് വിഭാഗം അറിയിച്ചത്, മധ്യ ഇസ്രായേലിൽ മിസൈൽ പതിച്ച സ്ഥലത്ത് നാല് പേർ മരിച്ചുവെന്നാണ്. കൂടാതെ, വടക്കൻ ഇസ്രായേലിലെ ഹൈഫയ്ക്ക് സമീപമുള്ള ഒരു റെസിഡൻഷ്യൽ മേഖലയിൽ മിസൈൽ പതിച്ച് ചുരുങ്ങിയത് നാല് പേരെങ്കിലും കൊല്ലപ്പെട്ടതായി നിരവധി ഇസ്രായേലി വാർത്താ ഔട്ട്ലെറ്റുകൾ റിപ്പോർട്ട് ചെയ്തു.

ഇറാനിയൻ ആക്രമണങ്ങൾക്ക് മറുപടിയായി ഇസ്രായേൽ സൈന്യം തെഹ്‌റാനിൽ കൂടുതൽ തിരിച്ചടികൾ നടത്തി. ഇറാനിലെ പ്രതിരോധ മന്ത്രാലയം ഉൾപ്പെടെ, രാജ്യത്തിന്റെ ആണവ പരിപാടിയുമായി ബന്ധപ്പെട്ട കെട്ടിടങ്ങളെയാണ് ലക്ഷ്യമിട്ടതെന്ന് ഇസ്രായേൽ സൈന്യം പ്രസ്താവനയിൽ അറിയിച്ചു.

ഈ ആക്രമണങ്ങളിൽ തലസ്ഥാനത്തെ ഷാഹ്‌റാൻ എണ്ണ സംഭരണ കേന്ദ്രത്തിന് നേരെയും മിസൈൽ പതിച്ചതായി ഇറാനിയൻ ഓയിൽ മന്ത്രാലയം സ്ഥിരീകരിച്ചു. സ്ഥിതിഗതികൾ നിയന്ത്രണവിധേയമാണെന്നും മന്ത്രാലയം കൂട്ടിച്ചേർത്തു.

കഴിഞ്ഞ രണ്ട് ദിവസത്തിനിടെ ഇസ്രായേൽ ആക്രമണങ്ങളിൽ കുറഞ്ഞത് 80 പേർ കൊല്ലപ്പെടുകയും 800 പേർക്ക് പരിക്കേൽക്കുകയും ചെയ്തതായി ഇറാനിയൻ മാധ്യമങ്ങൾ പറയുന്നു. കൊല്ലപ്പെട്ടവരിൽ 20 കുട്ടികളും ഉൾപ്പെടുന്നു.

അതേസമയം, ഇറാനിൽ നിന്നുള്ള മിസൈൽ ആക്രമണങ്ങൾക്ക് പിന്നാലെ, ഹൈഫയിലെ എണ്ണ ശുദ്ധീകരണ ശാലയ്ക്ക് സമീപം തീ കത്തുന്നതിന്റെ വീഡിയോ പുറത്തുവന്നിട്ടുണ്ട്.

ഇറാനിൽ നടന്ന ആക്രമണങ്ങളിൽ തങ്ങൾക്ക് യാതൊരു പങ്കുമില്ലെന്ന് യുഎസ് പ്രസിഡന്റ് ഡൊണാൾഡ് ട്രംപ് സോഷ്യൽ മീഡിയ പോസ്റ്റിലൂടെ വ്യക്തമാക്കി. “ഇന്ന് രാത്രി ഇറാനിൽ നടന്ന ആക്രമണത്തിൽ യുഎസിന് യാതൊരു പങ്കുമില്ല,” ട്രംപ് കുറിച്ചു.

തുടർച്ചയായ ഈ ആക്രമണങ്ങൾ മിഡിൽ ഈസ്റ്റിൽ കടുത്ത ആശങ്കയാണ് ഉയർത്തുന്നത്. സംഘർഷം കൂടുതൽ ശക്തിപ്രാപിക്കുന്നതോടെ ലോകരാജ്യങ്ങളും അതീവ ജാഗ്രതയിലാണ്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa