ഇറാൻ മിസൈൽ ആക്രമണത്തിൽ ഇസ്രായേലിൽ വ്യാപക നാശനഷ്ടം; പലയിടത്തും സ്ഫോടനങ്ങൾ, സോറോകോ ഹോസ്പിറ്റലിന് സമീപം മിസൈൽ പതിച്ചു, നിരവധി പേർക്ക് പരിക്ക് (വീഡിയോ)

June 19, 2025 International Desk

ഇസ്രായേലിനുനേരെ ഇറാൻ ഇന്ന് രാവിലെ നടത്തിയ ശക്തമായ മിസൈൽ ആക്രമണത്തിൽ രാജ്യത്തിന്റെ പല ഭാഗത്തും കനത്ത നാശനഷ്ടങ്ങൾ സംഭവിച്ചതായി റിപ്പോർട്ടുകൾ.

ദക്ഷിണ ഇസ്രായേലിലെ ബീർഷെബയിലുള്ള സോറോക്ക ആശുപത്രിയിൽ മിസൈൽ പതിക്കുകയും ആശുപത്രിക്ക് കാര്യമായ കേടുപാടുകൾ സംഭവിക്കുകയും ചെയ്തത് വലിയ ആശങ്കകൾക്ക് ഇടയാക്കിയിട്ടുണ്ട്.

ഇസ്രായേൽ സൈനിക വൃത്തങ്ങൾ നൽകുന്ന വിവരമനുസരിച്ച്, ഡസൻ കണക്കിന് ബാലിസ്റ്റിക് മിസൈലുകളാണ് ഇറാൻ തൊടുത്തത്. ഇതോടെ ഇസ്രായേലിന്റെ ഭൂരിഭാഗം പ്രദേശങ്ങളിലും സൈറണുകൾ മുഴങ്ങി.

ടെൽ അവീവിലും ജറുസലേമിലും ഉഗ്ര സ്ഫോടന ശബ്ദങ്ങൾ കേൾക്കാൻ സാധിച്ചു. ആക്രമണം നടന്ന സ്ഥലങ്ങളിലേക്ക് അടിയന്തര സേവനങ്ങൾ കുതിച്ചെത്തിയിട്ടുണ്ട്.

ബീർഷെബയിലെ സോറോക്ക മെഡിക്കൽ സെന്ററിനാണ് മിസൈൽ ആക്രമണത്തിൽ കനത്ത നാശനഷ്ടം സംഭവിച്ചത്. ആശുപത്രിക്ക് സമീപമുള്ള ഒരു കെട്ടിടത്തിലാണ് മിസൈൽ പതിച്ചതെങ്കിലും, അതിന്റെ ആഘാതത്തിൽ ആശുപത്രിക്ക് വലിയ നാശനഷ്ടമുണ്ടായി.

ആശുപത്രിയുടെ മേൽക്കൂര തകരുകയും ജനലുകൾ തകർന്നുതരിപ്പണമാവുകയും ചെയ്ത ദൃശ്യങ്ങൾ പുറത്തു വന്നു . സ്ഫോടനത്തിന് പിന്നാലെ പുക ഉയരുന്നതിന്റെയും, ആളുകൾ നിലവിളിച്ചുകൊണ്ട് ഓടുന്നതിന്റെയും ദൃശ്യങ്ങൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്.

സോറോക്ക ആശുപത്രിയുടെ വക്താവ് പറയുന്നത് അനുസരിച്ച്, ആക്രമണത്തിൽ ആശുപത്രിക്ക് “വിപുലമായ നാശനഷ്ടം” സംഭവിച്ചു. നിരവധി പേർക്ക് പരിക്കേറ്റിട്ടുമുണ്ട്.

സ്ഫോടനത്തെ തുടർന്നുണ്ടായ അപകടകരമായ വസ്തുക്കളുടെ ചോർച്ച സംബന്ധിച്ച ആശങ്കകൾ ഉള്ളതിനാൽ പൊതുജനങ്ങളോട് പ്രദേശം ഒഴിവാക്കാനും ആശുപത്രി ആവശ്യപ്പെട്ടിട്ടുണ്ട്. ഗാസയുമായുള്ള യുദ്ധത്തിന്റെ പശ്ചാത്തലത്തിൽ പരിക്കേറ്റ നിരവധി സൈനികർക്ക് ചികിത്സ നൽകി വരുന്ന ഒരു വലിയ ആശുപത്രിയാണ് സോറോക്ക.

സോറോക്ക ആശുപത്രിക്ക് പുറമെ ഇസ്രായേലിലെ മറ്റ് മൂന്ന് സാധാരണ ജനവാസ മേഖലകളിലും മിസൈലുകൾ പതിച്ചതായി സൈനിക ഉദ്യോഗസ്ഥർ അറിയിച്ചു. മധ്യ ഇസ്രായേലിലെ (ടെൽ അവീവ് പ്രദേശം ഉൾപ്പെടുന്ന ഗുഷ് ഡാൻ ഏരിയ) മൂന്ന് സ്ഥലങ്ങളിലാണ് മിസൈലുകൾ പതിച്ചത്.

ചില കെട്ടിടങ്ങൾക്ക് കനത്ത നാശനഷ്ടമുണ്ടായി. ഹോളിനിലെ ഒരു കെട്ടിടം പൂർണ്ണമായും തകർന്നതായും റിപ്പോർട്ടുണ്ട്. ആക്രമണങ്ങളിൽ 25 ഓളം പേർക്ക് പരിക്കേറ്റതായാണ് പ്രാഥമിക കണക്ക്. ഹോളിനിൽ ഒരാൾക്ക് ഗുരുതരമായി പരിക്കേൽക്കുകയും ഇരുപതിലധികം പേർക്ക് നിസ്സാര പരിക്കുകളുണ്ടാവുകയും ചെയ്തു.

ഇറാനിയൻ ഔദ്യോഗിക വാർത്താ ഏജൻസിയായ ഐആർഎൻഎ (IRNA) ടെലിഗ്രാമിലൂടെ അറിയിച്ചത്, ഈ പ്രഭാതത്തിലെ മിസൈൽ ആക്രമണത്തിന്റെ “പ്രധാന ലക്ഷ്യം” ഇസ്രായേൽ സൈന്യത്തിന്റെ കമാൻഡ് ആൻഡ് ഇൻ്റലിജൻസ് (IDF C4I) ആസ്ഥാനവും ഗാവ്-യാം ടെക്നോളജി പാർക്കിലെ സൈനിക ഇന്റലിജൻസ് ക്യാമ്പും ആയിരുന്നു എന്നാണ്.

ഈ സ്ഥാപനം ബീർഷെബയിലെ സോറോക്ക ആശുപത്രിക്ക് സമീപമാണെന്നും, മിസൈൽ ആക്രമണത്തിന്റെ ആഘാത തരംഗത്തിൽ ആശുപത്രിക്ക് നേരിയ കേടുപാടുകൾ മാത്രമാണ് സംഭവിച്ചതെന്നും ഐആർഎൻഎ അവകാശപ്പെട്ടു. “സൈനിക അടിസ്ഥാന സൗകര്യങ്ങൾ കൃത്യവും നേരിട്ടുള്ള ലക്ഷ്യമായിരുന്നു,” എന്നും അവർ കൂട്ടിച്ചേർത്തു.

People flee in fear at Soroka Medical Center, which was hit in Israel. Just like in Gaza.pic.twitter.com/9x4jtjyi1W
— Nisa Nur Çavuşoğlu (@cavusoglu_nisa) June 19, 2025