ഹൃദയം നുറുങ്ങി സ്പോൺസർ; മകനെപ്പോലെ കണ്ട പ്രവാസിക്ക് അന്ത്യയാത്ര, സിയാദിന്റെ കുടുംബത്തിന് ആജീവനാന്തം ശമ്പളം നൽകും

റിയാദിൽ എസി പൊട്ടിത്തെറിച്ച് അപ്രതീക്ഷിതമായി മരണപ്പെട്ട മലയാളി തൊഴിലാളി സിയാദിന്റെ മൃതദേഹം ഖബറിലേക്ക് ഇറക്കിവെക്കുമ്പോൾ നിയന്ത്രണം വിട്ട് കരയുന്ന സ്പോൺസറുടെ ദൃശ്യങ്ങൾ ഉള്ളുലയ്ക്കുന്നതായി.

മകനെപ്പോലെ സ്നേഹിച്ചിരുന്ന സിയാദ് ഓർമ്മയാകുന്നത് സ്പോൺസർക്ക് താങ്ങാനായില്ല. ഏറെ പ്രിയപ്പെട്ട ഒരാളെ നഷ്ടപ്പെട്ടതിന്റെ ദുഃഖം അദ്ദേഹത്തിന്റെ മുഖത്തും മനസ്സിലും തളംകെട്ടി നിന്നു.

എറണാകുളം പറവൂർ മാഞ്ഞാലിയിൽ കണിയാംപറമ്പിൽ ബഷീറിന്റെ മകനായ സിയാദ് (36) കഴിഞ്ഞ വെള്ളിയാഴ്ചയാണ് റിയാദിലെ താമസസ്ഥലത്ത് വെച്ച് മരണപ്പെട്ടത്.

ഉച്ചയ്ക്ക് വിശ്രമിക്കുന്നതിനിടെ എസിയുടെ കംപ്രസ്സർ പൊട്ടിത്തെറിക്കുകയും സിയാദിന് ഗുരുതരമായി പൊള്ളലേൽക്കുകയുമായിരുന്നു. ഈ അപകടത്തിലാണ് അദ്ദേഹത്തിന് ജീവൻ നഷ്ടമായത്. തൊട്ടടുത്ത ദിവസം റിയാദിലെ ഹയ്യൂൽ സലാം മഖ്ബറയിൽ സിയാദിന്റെ മൃതദേഹം ഖബറടക്കി.

മരണാനന്തര ചടങ്ങുകളിൽ പങ്കെടുത്ത സ്പോൺസർ വിങ്ങിപ്പൊട്ടി കരയുന്ന കാഴ്ച അവിടെ കൂടിയവരെയാകെ ദുഃഖത്തിലാഴ്ത്തി. സ്വന്തം പ്രായം പോലും വകവെക്കാതെ, അദ്ദേഹം സിയാദിന്റെ മയ്യിത്ത് ഖബറിലേക്ക് ഇറക്കിവെക്കാനും മറവുചെയ്യാനും സഹായിച്ചു.

ചടങ്ങുകൾക്ക് ശേഷം, അവിടെ കൂടിയവരെ സ്പോൺസർ സ്വന്തം വീട്ടിലേക്ക് ക്ഷണിക്കുകയും അവരുമായി ദീർഘനേരം സംസാരിക്കുകയും ചെയ്തു.

സിയാദിനോടുള്ള സ്നേഹവും നഷ്ടബോധവും എത്രത്തോളമുണ്ടെന്ന് വ്യക്തമാക്കിക്കൊണ്ട്, സ്പോൺസർ തന്റെ വീടിന് പുറത്ത് “സിയാദിന്റെ അനുസ്മരണം നടക്കുന്നു” എന്നൊരു ബോർഡും സ്ഥാപിച്ചു.

ഇതിനുപരിയായി, ജീവിച്ചിരിക്കുന്ന കാലത്തോളം സിയാദിന് താൻ നൽകിയിരുന്ന ശമ്പളം അദ്ദേഹത്തിന്റെ കുടുംബത്തിന് തുടർന്നും നൽകുമെന്ന അസാധാരണമായ പ്രഖ്യാപനവും സ്പോൺസർ നടത്തി.

അദ്ദേഹത്തിന്റെ ദുഃഖത്തിൽ ആശ്വാസമേകാനായി സൗദി പൗരന്മാരും മലയാളി പ്രവാസികളും ഉൾപ്പെടെ നിരവധി പേർ അവിടെയെത്തിയിരുന്നു.

പ്രവാസലോകത്ത് ഉടലെടുത്ത മാനുഷിക ബന്ധങ്ങളുടെ ഊഷ്മളതയും സ്നേഹബന്ധങ്ങളുടെ ആഴവും ഈ സംഭവം ഒരിക്കൽക്കൂടി ഓർമ്മിപ്പിക്കുന്നു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa