ചൂട് കനക്കുന്നു; മക്ക, മദീന സന്ദർശകർക്ക് ജാഗ്രതാ നിർദ്ദേശങ്ങളുമായി മന്ത്രാലയം

വേനൽക്കാലത്ത് സൗദി അറേബ്യയിൽ താപനില കുതിച്ചുയരുന്ന സാഹചര്യത്തിൽ, വിശുദ്ധ ഹറമുകളിലെത്തുന്ന തീർത്ഥാടകർക്ക് മാർഗ്ഗനിർദ്ദേശങ്ങളുമായി ഹജ്ജ്, ഉംറ മന്ത്രാലയം.

തീർത്ഥാടകരുടെ ആരോഗ്യത്തിനാണ് മന്ത്രാലയം ഏറ്റവും വലിയ പരിഗണന നൽകുന്നതെന്ന് അധികൃതർ ഊന്നിപ്പറഞ്ഞു.

പ്രധാനമായും, ഉച്ചസമയങ്ങളിൽ നേരിട്ടുള്ള സൂര്യപ്രകാശം ഏൽക്കുന്നത് പൂർണ്ണമായും ഒഴിവാക്കണമെന്ന് മന്ത്രാലയം അഭ്യർത്ഥിച്ചു.

തീർത്ഥാടന കേന്ദ്രങ്ങൾക്കിടയിലും വിശുദ്ധ കഅബയുടെ മുറ്റങ്ങളിലുമൊക്കെ സഞ്ചരിക്കുമ്പോൾ കുടകൾ നിർബന്ധമായും ഉപയോഗിക്കാനും നിർദ്ദേശമുണ്ട്.

ശരീരത്തിലെ ജലാംശം നിലനിർത്താനായി ധാരാളം വെള്ളവും മറ്റ് ദ്രാവകങ്ങളും കുടിക്കേണ്ടതിന്റെ പ്രാധാന്യവും മന്ത്രാലയം ഓർമ്മിപ്പിച്ചു.

ശരീര താപനില വർദ്ധിപ്പിക്കാനും സൂര്യാഘാത സാധ്യത കൂട്ടാനും ഇടയാക്കുന്ന കനത്ത വസ്ത്രങ്ങൾ ഒഴിവാക്കണമെന്നും, അയഞ്ഞതും ഇളം നിറത്തിലുള്ളതുമായ വസ്ത്രങ്ങൾ ധരിക്കണമെന്നും നിർദ്ദേശങ്ങളിൽ പറയുന്നു.

ലോകമെമ്പാടുമുള്ള തീർത്ഥാടകർക്ക് ആരോഗ്യകരവും സുരക്ഷിതവുമായ ഒരന്തരീക്ഷത്തിൽ, യാതൊരു ബുദ്ധിമുട്ടുമില്ലാതെ ആചാരങ്ങൾ പൂർത്തിയാക്കാൻ കഴിയുന്നുണ്ടെന്ന് ഉറപ്പാക്കാനുള്ള മന്ത്രാലയത്തിന്റെ നിരന്തരമായ ശ്രമങ്ങളുടെ ഭാഗമാണ് ഈ ബോധവൽക്കരണ കാമ്പയിൻ.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa