ജിദ്ദയിൽ വൻ വ്യാജഫോൺ വേട്ട; ആയിരത്തിലധികം മൊബൈൽ ഫോണുകളും മൂന്ന് ലക്ഷത്തിലധികം വ്യാജ അനുബന്ധ ഉൽപ്പന്നങ്ങളും പിടിച്ചെടുത്തു, മൂന്ന് വിദേശികൾ അറസ്റ്റിൽ

ജിദ്ദ ആസ്ഥാനമായി പ്രവർത്തിക്കുന്ന ഒരു സ്ഥാപനത്തിൽ വാണിജ്യ മന്ത്രാലയത്തിൻ്റെ പരിശോധനാ സംഘം നടത്തിയ റെയ്ഡിൽ 1,196 വ്യാജ സ്മാർട്ട്‌ഫോണുകളും ഹെഡ്‌ഫോണുകൾ, ചാർജറുകൾ, സ്റ്റിക്കറുകൾ തുടങ്ങിയ 3,22,000-ത്തിലധികം വ്യാജ ഉൽപ്പന്നങ്ങളും പിടിച്ചെടുത്തു.

നേരത്തെ റിയാദിൽ വെച്ച് മന്ത്രാലയം ഉദ്യോഗസ്ഥർ പിടിച്ചെടുത്ത വ്യാജ ഫോണുകളെക്കുറിച്ച് നടത്തിയ അന്വേഷണമാണ് ജിദ്ദയിലെ ഈ കേന്ദ്രത്തിലേക്ക് എത്തിച്ചത്.

നിയമപരമായി പ്രാദേശിക വിപണിയിൽ എത്തിയ ചൈനീസ് സ്മാർട്ട്‌ഫോണുകൾ റീപ്രോഗ്രാം ചെയ്ത് പ്രമുഖ ബ്രാൻഡുകളുടെ ലോഗോകളും സ്റ്റിക്കറുകളും പതിച്ച് വിൽക്കാൻ ശ്രമിച്ചതായി പരിശോധനയിൽ കണ്ടെത്തി.

വാണിജ്യ തട്ടിപ്പിൽ ഏർപ്പെട്ടതിന് രണ്ട് ഏഷ്യക്കാർ ഉൾപ്പെടെ മൂന്ന് വിദേശികളെ സുരക്ഷാ അധികൃതർ അറസ്റ്റ് ചെയ്യുകയും സ്ഥാപനം അടച്ചുപൂട്ടുകയും ചെയ്തു.

മുനിസിപ്പാലിറ്റി, ഭവന മന്ത്രാലയം, മാനവ വിഭവശേഷി, സാമൂഹിക വികസന മന്ത്രാലയം, സകാത്ത്, നികുതി, കസ്റ്റംസ് അതോറിറ്റി, ജിദ്ദ പോലീസ് എന്നിവരുമായി സഹകരിച്ചാണ് സംയുക്ത പരിശോധന നടത്തിയത്.

വാണിജ്യ തട്ടിപ്പ് വിരുദ്ധ നിയമം അനുസരിച്ച്, ഇത്തരം ലംഘനങ്ങൾക്ക് പരമാവധി മൂന്ന് വർഷം വരെ തടവ്, 10 ലക്ഷം റിയാൽ വരെ പിഴ, അല്ലെങ്കിൽ ഇവ രണ്ടും ഒരുമിച്ചോ ശിക്ഷയായി ലഭിക്കാവുന്ന കുറ്റമാണ്.

കൂടാതെ, നിയമലംഘനം പരസ്യപ്പെടുത്തുകയും കുറ്റക്കാരായ വിദേശ തൊഴിലാളികളെ നാടുകടത്തുകയും ചെയ്യും. ഉപഭോക്താക്കളെ കബളിപ്പിക്കുന്ന വാണിജ്യ തട്ടിപ്പ് നിയമലംഘകർക്കെതിരെ വാണിജ്യ മന്ത്രാലയം കർശന നടപടി തുടരുകയാണ്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa