അതിശയകരം ഈ പുതിയ കണ്ടെത്തൽ; ദിവസവും വെറും അഞ്ച് മിനിറ്റ് മാത്രം മാറ്റിവെച്ചാൽ പത്ത് ശതമാനം വരെ ആയുസ്സ് വർദ്ധിപ്പിക്കാമെന്ന് പുതിയ പഠനം

ദീർഘായുസ്സ് നേടാൻ ദീർഘനേരത്തെ വ്യായാമമോ കഠിനാധ്വാനമോ അനിവാര്യമാണെന്ന പൊതുധാരണ തിരുത്തിക്കുറിക്കുന്ന പുതിയ പഠന റിപ്പോർട്ട് പുറത്ത്.

ദിവസവും വെറും 5 മിനിറ്റ് അധികമായി വ്യായാമം ചെയ്യുന്നതും, പകൽ സമയത്തെ ഇരിപ്പ് 30 മിനിറ്റ് കുറയ്ക്കുന്നതും അകാല മരണം തടയാൻ സഹായിക്കുമെന്ന് ലോകപ്രശസ്ത മെഡിക്കൽ ജേണലായ ‘ദി ലാൻസെറ്റ്’ പുറത്തുവിട്ട പഠനം വ്യക്തമാക്കുന്നു.

പഠനത്തിലെ പ്രധാന കണ്ടെത്തലുകൾ നോർവീജിയൻ സ്കൂൾ ഓഫ് സ്പോർട്ട് സയൻസസിലെ പ്രൊഫസർ ഉൾഫ് എകെലുണ്ടിന്റെ നേതൃത്വത്തിൽ 1,35,000-ത്തിലധികം ആളുകളിൽ നടത്തിയ പഠനത്തിലാണ് ഈ നിർണ്ണായക വിവരങ്ങളുള്ളത്.

ദിവസവും വെറും അഞ്ച് മിനിറ്റ് അധികമായി വേഗത്തിലുള്ള നടത്തമോ, പടികൾ കയറുന്നതോ പോലുള്ള ലഘുവായ വ്യായാമങ്ങളിൽ ഏർപ്പെടുന്നത് മരണസാധ്യത 10 ശതമാനം വരെ കുറയ്ക്കാൻ സഹായിക്കും. വ്യായാമം തീരെ ചെയ്യാത്തവരിലാണ് ഇതിന്റെ ഗുണം ഏറ്റവും കൂടുതൽ പ്രകടമാകുന്നത്.

തുടർച്ചയായ ഇരിപ്പ് ഒഴിവാക്കി പകരം 30 മിനിറ്റ് നേരം വീട്ടുജോലികളിലോ ലഘുവായ നടത്തത്തിലോ ഏർപ്പെടുന്നത് മരണസാധ്യത 7 ശതമാനം വരെ കുറയ്ക്കും.

ലോകാരോഗ്യ സംഘടന (WHO) നിർദ്ദേശിക്കുന്ന 150 മിനിറ്റ് പ്രതിവാര വ്യായാമം ചെയ്യാൻ സാധിക്കാത്തവർക്കും ഇത്തരം ചെറിയ മാറ്റങ്ങളിലൂടെ വലിയ ആരോഗ്യ നേട്ടങ്ങൾ കൊയ്യാമെന്ന് ഗവേഷകർ ചൂണ്ടിക്കാട്ടുന്നു.

തുടർച്ചയായി ഇരിക്കുന്നത് ശരീരത്തിലെ മെറ്റബോളിസത്തെ മന്ദീഭവിപ്പിക്കുകയും ഹൃദ്രോഗം, പ്രമേഹം തുടങ്ങിയവയ്ക്കുള്ള സാധ്യത വർദ്ധിപ്പിക്കുകയും ചെയ്യുന്നു.

എന്നാൽ ഓരോ 30 മിനിറ്റിലും ഒന്ന് എഴുന്നേൽക്കുന്നതോ, 5 മിനിറ്റ് വേഗത്തിൽ നടക്കുന്നതോ രക്തസമ്മർദ്ദം നിയന്ത്രിക്കാനും പേശികളുടെ പ്രവർത്തനം മെച്ചപ്പെടുത്താനും സഹായിക്കും. ഇതിനെ ശാസ്ത്രജ്ഞർ ‘എക്സർസൈസ് സ്നാക്സ്’ എന്നാണ് വിളിക്കുന്നത്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa