കരുത്തുറ്റ ചുവടുകളുമായി സൗദി വനിതകൾ; സുരക്ഷാ രംഗത്ത് വിപ്ലവം തീർത്ത് മുന്നൂറിലധികം വനിതാ കേഡറ്റുകൾ പരിശീലനം കഴിഞ്ഞ് പുറത്തിറങ്ങി

സൗദി അറേബ്യയുടെ ആഭ്യന്തര സുരക്ഷാ മേഖലയ്ക്ക് പുത്തൻ ഉണർവ് നൽകിക്കൊണ്ട് മുന്നൂറിലധികം വനിതാ കേഡറ്റുകൾ പരിശീലനം കഴിഞ്ഞ് പുറത്തിറങ്ങി.

ആഭ്യന്തര മന്ത്രിയും സൗദി പബ്ലിക് സെക്യൂരിറ്റി മേധാവിയുമായ പ്രിൻസ് അബ്ദുൽ അസീസ് ബിൻ സൗദ് ബിൻ നായിഫിന്റെ നേതൃത്വത്തിൽ നടന്ന ചടങ്ങിൽ 328 വനിതാ കേഡറ്റുകളാണ് തങ്ങളുടെ പരിശീലനം വിജയകരമായി പൂർത്തിയാക്കിയത്.

റിയാദിലെ വുമൺസ് ട്രെയിനിംഗ് ഇൻസ്റ്റിറ്റ്യൂട്ടിൽ നടന്ന ബിരുദദാന ചടങ്ങിൽ പബ്ലിക് സെക്യൂരിറ്റി ഡയറക്ടർ ലെഫ്റ്റനന്റ് ജനറൽ മുഹമ്മദ് അൽ ബസാമി ഉൾപ്പെടെയുള്ള പ്രമുഖർ പങ്കെടുത്തു.

തീവ്രമായ സൈദ്ധാന്തിക പഠനത്തിനും പ്രായോഗിക പരിശീലനത്തിനും ശേഷമാണ് എട്ടാം ബാച്ചിൽ പെട്ട ഇവർ സുരക്ഷാ ഡ്യൂട്ടികൾക്കായി സജ്ജരായത്.

സുരക്ഷാ നിയമങ്ങൾ, പ്രവർത്തന നടപടിക്രമങ്ങൾ, പ്രതിസന്ധികളെ നേരിടാനുള്ള കഴിവുകൾ എന്നിവയിൽ ഇവർക്ക് പ്രത്യേക പരിശീലനം നൽകിയിട്ടുണ്ട്.

സൗദി അറേബ്യയുടെ സുരക്ഷാ രംഗത്ത് വനിതാ സാന്നിധ്യം വർധിപ്പിക്കുക എന്ന ലക്ഷ്യത്തോടെയാണ് ഈ പരിശീലന പരിപാടി നടപ്പിലാക്കുന്നത്.

സൗദി വിഷൻ 2030-ന്റെ ഭാഗമായി രാജ്യത്തിന്റെ വിവിധ തൊഴിൽ മേഖലകളിൽ വനിതാ പങ്കാളിത്തം ഉറപ്പാക്കുന്നതിന്റെ ഉദാഹരണമാണ് ഈ പുതിയ ബാച്ചിന്റെ കടന്നുവരവ്.

പൂർണ്ണമായ പ്രൊഫഷണലിസത്തോടും കാര്യക്ഷമതയോടും കൂടി രാജ്യത്തിന്റെ സുരക്ഷാ ഉത്തരവാദിത്തങ്ങൾ ഏറ്റെടുക്കാൻ ഇവർ പ്രാപ്തരാണെന്ന് ആഭ്യന്തര മന്ത്രാലയം വ്യക്തമാക്കി.

മക്കയിലെയും മദീനയിലെയും തീർത്ഥാടകരുടെ സേവനം ഉൾപ്പെടെയുള്ള പ്രധാന സുരക്ഷാ ചുമതലകളിൽ ഇവർ സജീവമായ പങ്കുവഹിക്കും.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa