ഫലസ്തീൻ ഗ്രാമത്തിൽ ഇസ്രായേൽ കുടിയേറ്റക്കാരുടെ അഴിഞ്ഞാട്ടം; 19 കാരനെ വെടിവെച്ചു കൊന്നു, 300 ലധികം ആടുകളെ കവർന്നു

വെസ്റ്റ് ബാങ്കിലെ മുഖ്‌മാസ് ഗ്രാമത്തിൽ ഇസ്രായേൽ കുടിയേറ്റക്കാർ നടത്തിയ ക്രൂരമായ ആക്രമണത്തിൽ 19 വയസ്സുകാരനായ നസ്‌റല്ല മുഹമ്മദ് ജമാൽ അബു സിയാം കൊല്ലപ്പെട്ട സംഭവം അന്താരാഷ്ട്ര തലത്തിൽ വലിയ പ്രതിഷേധത്തിന് കാരണമായി.

ഫലസ്തീൻ പൗരത്വത്തോടൊപ്പം അമേരിക്കൻ പൗരത്വവും ഉള്ള യുവാവാണ് നസ്‌റല്ല. 2026-ൽ ഇസ്രായേൽ കുടിയേറ്റക്കാരുടെ ആക്രമണത്തിൽ കൊല്ലപ്പെടുന്ന ആദ്യത്തെ ഫലസ്തീനിയാണ് ഇദ്ദേഹം.

ഫെബ്രുവരി 18 ബുധനാഴ്ച വൈകുന്നേരമാണ് ‘മാലെ മിക്മാഷ്’ എന്ന അനധികൃത കുടിയേറ്റ കേന്ദ്രത്തിൽ നിന്നും മുപ്പതോളം വരുന്ന സായുധ സംഘം ഗ്രാമത്തിൽ അക്രമം അഴിച്ചുവിട്ടത്. ഗ്രാമവാസികളുടെ ഏക ഉപജീവന മാർഗ്ഗമായ 380 ഓളം ആടുകളെ കുടിയേറ്റക്കാർ ഫാമുകളിൽ നിന്ന് ബലം പ്രയോഗിച്ച് കവർന്നു.

ഇത് തടയാൻ ശ്രമിച്ച ഗ്രാമവാസികൾക്ക് നേരെ കുടിയേറ്റക്കാർ വെടിവെപ്പ് നടത്തുകയായിരുന്നു. ആക്രമണത്തിൽ നസ്‌റല്ലയ്ക്ക് പുറമെ മറ്റ് നാല് ഫലസ്തീനികൾക്കും ഗുരുതരമായി പരിക്കേറ്റിട്ടുണ്ട്.

ദൃക്‌സാക്ഷികൾ നൽകുന്ന വിവരമനുസരിച്ച്, വെടിയേറ്റു വീണവരെ കുടിയേറ്റക്കാർ വടികളും കല്ലുകളും ഉപയോഗിച്ച് ക്രൂരമായി മർദ്ദിച്ചു. ആക്രമണ സമയത്ത് സ്ഥലത്തെത്തിയ ഇസ്രായേൽ സൈന്യം കുടിയേറ്റക്കാരെ തടയുന്നതിന് പകരം അവരെ സഹായിക്കുകയാണ് ചെയ്തത്.

പ്രതിഷേധിച്ച ഗ്രാമവാസികൾക്ക് നേരെ കണ്ണീർവാതകവും ശബ്ദബോംബുകളും പ്രയോഗിച്ച് കുടിയേറ്റക്കാർക്ക് സംരക്ഷണമൊരുക്കുകയാണ് പോലീസ് ചെയ്തതെന്ന് നാട്ടുകാർ ആരോപിക്കുന്നു. “മനുഷ്യത്വമില്ലാത്ത മൃഗങ്ങളെപ്പോലെയാണ് അവർ പെരുമാറിയത്” എന്നാണ് ആക്രമണത്തെ അതിജീവിച്ചവർ മാധ്യമങ്ങളോട് പറഞ്ഞത്.

ഈ സംഭവത്തിൽ അമേരിക്കൻ എംബസി ശക്തമായ പ്രതിഷേധം രേഖപ്പെടുത്തുകയും അന്വേഷണം ആവശ്യപ്പെടുകയും ചെയ്തിട്ടുണ്ട്. വെസ്റ്റ് ബാങ്കിൽ റമദാൻ മാസത്തിന് മുന്നോടിയായി കുടിയേറ്റക്കാരുടെ അതിക്രമങ്ങൾ വർദ്ധിക്കുന്നത് പ്രദേശത്ത് വലിയ തോതിലുള്ള അസ്വസ്ഥതകൾക്ക് കാരണമാകുന്നുണ്ട്.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa