താൽക്കാലിക ആശ്വാസം: ഇസ്രായേലിനെതിരെയുള്ള ആദ്യഘട്ട മിസൈൽ വർഷം പൂർത്തിയായെന്ന് ഇറാൻ, ആക്രമണം തുടർന്നാൽ തിരിച്ചടിക്കുമെന്ന് മുന്നറിയിപ്പ്
ലെബനന് നേരെയുള്ള ഇസ്രായേൽ ആക്രമണത്തിന് മറുപടിയായി ഇസ്രായേൽ നഗരങ്ങളെ ലക്ഷ്യം വെച്ച് ഇറാൻ നടത്തിയ ആദ്യഘട്ട സൈനിക ആക്രമണങ്ങൾ അവസാനിച്ചതായി സൈന്യം തിങ്കളാഴ്ച പ്രഖ്യാപിച്ചു.
എന്നാൽ, ഇസ്രായേൽ തങ്ങളുടെ ആക്രമണങ്ങൾ തുടരുകയാണെങ്കിൽ വീണ്ടും ശക്തമായ മിസൈൽ വർഷം നടത്തുമെന്നും ഇറാൻ മുന്നറിയിപ്പ് നൽകിയിട്ടുണ്ട്.
ഞായറാഴ്ച രാത്രി വൈകി ഇറാൻ ഇസ്രായേലിന് നേരെ മിസൈൽ ആക്രമണം നടത്തിയതിന് പിന്നാലെ തിങ്കളാഴ്ച പുലർച്ചെ ഇസ്രായേൽ ഇറാനിൽ തിരിച്ചടി നടത്തിയിരുന്നു. വെടിനിർത്തലിന് ശേഷം ഇരുരാജ്യങ്ങളും തമ്മിൽ നേരിട്ടുണ്ടാകുന്ന ആദ്യത്തെ സൈനിക ഏറ്റുമുട്ടലാണിത്.
ഇരുരാജ്യങ്ങളും പരസ്പരം സുപ്രധാന സാമ്പത്തിക-സൈനിക കേന്ദ്രങ്ങളെയാണ് ഈ ഘട്ടത്തിൽ ലക്ഷ്യമിട്ടത്. തെക്കുപടിഞ്ഞാറൻ ഇറാനിലെ ഒരു പ്രമുഖ പെട്രോകെമിക്കൽ പ്ലാന്റിന് നേരെയാണ് ഇസ്രായേൽ ആക്രമണം നടത്തിയത്. ബാലിസ്റ്റിക് മിസൈലുകൾ നിർമ്മിക്കാൻ ഉപയോഗിക്കുന്ന കേന്ദ്രമാണിതെന്ന് ഇസ്രായേൽ അവകാശപ്പെട്ടു.
ഇതിന് തിരിച്ചടിയായി ഇസ്രായേലിലെ ഹൈഫ നഗരത്തിലുള്ള സമാനമായ ഒരു പെട്രോകെമിക്കൽ പ്ലാന്റിനെ ലക്ഷ്യമിട്ട് തങ്ങൾ ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് സ്ഥിരീകരിച്ചു.
മേഖലയിലെ സ്ഥിതിഗതികൾ വഷളാകുന്നതിനിടെ യുഎസ് പ്രസിഡന്റ് ഡൊണാൾഡ് ട്രംപ് ഇരുപക്ഷത്തോടും ശക്തമായ ഭാഷയിൽ സംസാരിച്ചു. ഇസ്രായേലും ഇറാനും തമ്മിലുള്ള വെടിവെയ്പ്പ് ഉടനടി അവസാനിപ്പിക്കണമെന്ന് ട്രംപ് ആവശ്യപ്പെട്ടു.
പശ്ചിമേഷ്യൻ യുദ്ധം എന്നെന്നേക്കുമായി അവസാനിപ്പിക്കാൻ അമേരിക്കയുടെ നേതൃത്വത്തിൽ നടന്നു വന്നിരുന്ന സമാധാന ചർച്ചകളെയും വെടിനിർത്തൽ ശ്രമങ്ങളെയും പൂർണ്ണമായി തകർക്കുന്നതാണ് ഇപ്പോൾ ഉണ്ടായിരിക്കുന്ന പുതിയ ആക്രമണ പരമ്പരകൾ.
ഇരുരാജ്യങ്ങളും തമ്മിലുള്ള നേരിട്ടുള്ള പോരാട്ടം ആഗോള വിപണിയെയും ബാധിച്ചു കഴിഞ്ഞു. പുതിയ യുദ്ധസാഹചര്യത്തെ തുടർന്ന് അന്താരാഷ്ട്ര വിപണിയിൽ അസംസ്കൃത എണ്ണവില നാല് ശതമാനത്തോളം ഉയർന്നു.
അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
Arabian Malayali WhatsApp Group