പ്രവാസി മലയാളികൾക്കഭിമാനം; മഞ്ജു മണിക്കുട്ടന് “നാരി ശക്തി പുരസ്‌കാരം” 

അന്താരാഷ്ട്ര വനിതാ ദിനത്തോടനുബന്ധിച്ചു എല്ലാ വർഷവും മാർച്ച് 8ന്, കേന്ദ്ര വനിതാ,ശിശുക്ഷേമ മന്ത്രാലയമാണ് “നാരി ശക്തി പുരസ്‌കാരം” നൽകുന്നത്. സ്ത്രീ ശാക്തീകരണത്തിനായി  വ്യത്യസ്ത മേഖലകളിൽ പ്രവർത്തിച്ചു കഴിവ് തെളിയിച്ച ഇന്ത്യൻ വനിതകൾക്കാണ് ഈ അവാർഡ് നൽകുന്നത്. സർട്ടിഫിക്കറ്റും ഒരു ലക്ഷം രൂപ ക്യാഷ് പ്രൈസും ഉൾപ്പെടുന്നതാണ് അവാർഡ്. ഡല്‍ഹിയില്‍ വെച്ച് മാര്‍ച്ച്‌ 8 ന്  ഇന്ത്യന്‍ രാഷ്ട്രപതിയുടെ കൈയ്യില്‍ നിന്നും മഞ്ജു മണിക്കുട്ടന്‍ അവാര്‍ഡ്‌ ഏറ്റു വാങ്ങും.

ദമ്മാം വനിതാ അഭയകേന്ദ്രത്തിലെ അശരണരായ വനിതകളുടെ പ്രശ്നങ്ങളിൽ നിരന്തരമായി ഇടപെട്ടു കൊണ്ടിരുന്ന സഫിയാ അജിത്തിന്റെ വലംകൈയായി മഞ്ജു മാറി. ക്യാൻസർ രോഗബാധിതയായിരുന്ന  സഫിയ അജിത്‌ അപ്രതീക്ഷിതമായി 2016ൽ  മരണമടഞ്ഞതോടെ, സഫിയയ്ക്ക് പൂർത്തിയാക്കാനാകാതെ  പോയ കേസുകളുടെ ചുമതല മഞ്ജു ഏറ്റെടുക്കുകയായിരുന്നു. അത്തരം കേസുകൾ വളരെ പെട്ടെന്നു തന്നെ അവർ പൂർത്തീകരിച്ചു. തുടർന്ന് വനിതാ അഭയകേന്ദ്രത്തിലെ ജീവകാരുണ്യ പ്രവർത്തനങ്ങളുടെ പൂർണ്ണചുമതല നവയുഗം ജീവകാരുണ്യവിഭാഗം മഞ്ജു മണിക്കുട്ടന് നൽകി. ബ്യൂട്ടിപാര്‍ലറിലെ ജോലിയും, വീട്ടുജോലികളും കഴിഞ്ഞാല്‍ പൂര്‍ണ്ണമായും ജീവകാരുണ്യപ്രവര്‍ത്തനങ്ങള്‍ക്കായി അവര്‍ മാറ്റി വെച്ചു.

സാമൂഹ്യപ്രവര്‍ത്തനങ്ങള്‍ക്കിടയില്‍   മഞ്ജുവിന് പലപ്പോഴും ഏറെ വെല്ലുവിളികളും, ഭീക്ഷണികളും, നിയമനടപടികളും  ഒക്കെ  ഒക്കെ നേരിടേണ്ടി വന്നിട്ടുണ്ട്. നവയുഗം ജീവകാരുണ്യവിഭാഗത്തിന്റെയും, ഇന്ത്യന്‍ സമൂഹത്തിന്റെയും, എംബസ്സിയുടെയും ഉറച്ച പിന്തുണയോടെ അവയെ മറികടന്ന് ഒരുപാട് പ്രവാസികളെ നിയമക്കുരുക്കുകളില്‍ നിന്നും രക്ഷപ്പെടുത്താന്‍ കഴിഞ്ഞു.  ജീവകാരുണ്യപ്രവര്‍ത്തനത്തിന്റെ പേരില്‍ വിവിധ പ്രവാസി സംഘടനകള്‍ നല്‍കിയ ഒട്ടേറെ പുരസ്ക്കാരങ്ങള്‍ മഞ്ജുവിനെ തേടിയെത്തിയിട്ടുണ്ട്.

നവയുഗം കേന്ദ്രകമ്മിറ്റി വൈസ് പ്രസിഡന്റ്‌ എന്ന നിലയില്‍ സജീവമായി പ്രവര്‍ത്തിയ്ക്കുന്ന മഞ്ജു മണിക്കുട്ടന്‍, നവയുഗം നടത്തിയ  സാമൂഹിക സാംസ്ക്കാരികപരിപാടികളില്‍ സംഘാടകയായും കഴിവ് തെളിയിച്ചിട്ടുണ്ട്.  നിസ്വാര്‍ത്ഥമായ ജീവകാരുണ്യപ്രവര്‍ത്തനത്തിലൂടെ  രാജ്യത്തിൻറെ പരമോന്നത വനിത ബഹുമതി നേടിയ  മഞ്ജു മണിക്കുട്ടനെ  നവയുഗം കേന്ദ്രകമ്മിറ്റി അഭിനന്ദിച്ചു.. നവയുഗം ജീവകാരുണ്യവിഭാഗം  പന്ത്രണ്ടു വര്‍ഷത്തിലേറെയായി ഒറ്റക്കെട്ടായി നടത്തി വരുന്ന പ്രവര്‍ത്തനങ്ങള്‍ക്ക് ലഭിച്ച ഏറ്റവും വലിയ അംഗീകാരമായി മഞ്ജുവിന്റെ  ഈ നേട്ടത്തെ  കാണുന്നതായും നവയുഗം കേന്ദ്രകമ്മിറ്റി പത്രപ്രസ്താവനയില്‍ പറഞ്ഞു.