ശക്തമായ മഴ, പൊടിക്കാറ്റ്; സൗദിയിലെ വിവിധ പ്രദേശങ്ങൾക്ക് കാലാവസ്ഥാ മുന്നറിയിപ്പ്

സൗദി അറേബ്യയിലെ എട്ട് പ്രധാന പ്രവിശ്യകളിൽ ഇന്ന് ദേശീയ കാലാവസ്ഥാ കേന്ദ്രം വിവിധ തീവ്രതയിലുള്ള കാലാവസ്ഥാ മുന്നറിയിപ്പുകൾ പുറപ്പെടുവിച്ചു.

കനത്തതോ നേരിയതോ ആയ മഴ, ശക്തമായ കാറ്റ്, പൊടികാറ്റ്, ദൃശ്യപരിധി കുറയൽ എന്നിവയാണ് ഈ പ്രദേശങ്ങളിൽ പ്രധാനമായും പ്രതീക്ഷിക്കുന്നത്.

അസീർ പ്രവിശ്യയിലാണ് ഏറ്റവും കൂടുതൽ മുന്നറിയിപ്പുകൾ നൽകിയിട്ടുള്ളത്; ചില സ്ഥലങ്ങളിൽ റെഡ് അലർട്ട് വരെ പ്രഖ്യാപിച്ചു. അബ്ഹ, ഖമീസ് മുഷൈത്ത്, ബിഷ, തനൂമ ഉൾപ്പെടെ ഇരുപതോളം ജില്ലകളിൽ രാവിലെ 9 മണി മുതൽ രാത്രി 9 മണി വരെ കനത്ത മഴ, ഇടിമിന്നൽ, ആലിപ്പഴം വീഴ്ച, ശക്തമായ വെള്ളപ്പൊക്കം, ദൃശ്യപരിധി പൂർണ്ണമായി ഇല്ലാതാകൽ എന്നിവ പ്രതീക്ഷിക്കുന്നു.

ജിസാൻ പ്രവിശ്യയിൽ പല തലത്തിലുള്ള മുന്നറിയിപ്പുകൾ ഉണ്ട്. അബൂ അരീഷ്, സംത, സബിയ, ഫൈഫ, ഹറൂബ് തുടങ്ങിയ ജില്ലകളിൽ കനത്തതോ ഇടത്തരമോ ആയ മഴ, ശക്തമായ കാറ്റ്, ഇടിമിന്നൽ, വെള്ളപ്പൊക്ക സാധ്യത, ദൃശ്യപരിധി കുറയൽ എന്നിവയാണ് പ്രവചിക്കപ്പെടുന്നത്.

കിഴക്കൻ പ്രവിശ്യ (അൽ-ശർഖിയ): ദമ്മാം, ഖോബാർ, ജുബൈൽ, അൽ-അഹ്സ തുടങ്ങിയ ജില്ലകളിൽ മണിക്കൂറിൽ 49 കി.മീറ്റർ വരെ വേഗത്തിൽ ശക്തമായ കാറ്റും പൊടിപടലങ്ങളും വീശിയേക്കാം. ഇത് ദൃശ്യപരിധി ഗണ്യമായി കുറയ്ക്കാൻ സാധ്യതയുണ്ട്.

മക്ക പ്രവിശ്യയിൽ മക്ക നഗരം, ജിദ്ദ, തായിഫ്, റാബിഗ് തുടങ്ങിയ ജില്ലകളിൽ ശക്തമായ കാറ്റ്, പൊടിപടലങ്ങൾ, നേരിയ മഴ, ഇടിമിന്നൽ എന്നിവ വൈകുന്നേരം വരെ തുടരാൻ സാധ്യതയുണ്ട്.

നജ്‌റാൻ പ്രവിശ്യയിൽ ബദർ അൽ-ജുനൂബ്, ഷറൂറ, നജ്‌റാൻ ഉൾപ്പെടെയുള്ള സ്ഥലങ്ങളിൽ നേരിയ മഴ, ശക്തമായ കാറ്റ്, ഇടിമിന്നൽ, 3 മുതൽ 5 കി.മീറ്റർ വരെ ദൃശ്യപരിധി കുറയ്ക്കുന്ന പൊടിപടലങ്ങൾ എന്നിവ ഉണ്ടാകാൻ സാധ്യതയുണ്ട്.

തബൂക്ക് പ്രവിശ്യയിലെ ദുബാ, ഹഖൽ, ഉംലജ്, നിയോം-ശർമ തുടങ്ങിയ ജില്ലകളിൽ മണിക്കൂറിൽ 40 മുതൽ 49 കി.മീറ്റർ വരെ വേഗതയിൽ കാറ്റടിക്കുകയും കാഴ്ചാ പരിധി കുറയുകയും ചെയ്യും. ഇത് ബുധനാഴ്ച വൈകുന്നേരം വരെ നീണ്ടുനിൽക്കും.

അൽ-ബാഹ പ്രവിശ്യയിൽ അൽ-ബാഹ, ബൽജുറഷി, ഖിൽവ ഉൾപ്പെടെയുള്ള ജില്ലകളിൽ നേരിയ മഴ, ശക്തമായ കാറ്റ്, ഇടിമിന്നൽ എന്നിവയും കാഴ്ചാ പരിധി കുറയാനുള്ള സാധ്യതയുമുണ്ട്.

മദീന പ്രവിശ്യയിൽ ബദർ, യാൻബു, അൽ-മഹ്ദ് തുടങ്ങിയ ജില്ലകളിൽ ശക്തമായ കാറ്റ് വീശാനും കാഴ്ചാ പരിധി കുറയാനും സാധ്യതയുണ്ടെന്നും ഈ അവസ്ഥ വൈകുന്നേരം 7 മണി വരെ നീണ്ടുനിൽക്കുമെന്നും അധികൃതർ അറിയിച്ചു.

ഈ കാലാവസ്ഥാ മാറ്റങ്ങൾ കണക്കിലെടുത്ത് പൊതുജനങ്ങൾ അതീവ ജാഗ്രത പാലിക്കണമെന്നും, പ്രത്യേകിച്ച് വെള്ളപ്പൊക്ക സാധ്യതയുള്ള താഴ്ന്ന പ്രദേശങ്ങളിലൂടെയുള്ള യാത്രകൾ ഒഴിവാക്കണമെന്നും ദേശീയ കാലാവസ്ഥാ കേന്ദ്രം നിർദ്ദേശിക്കുന്നു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa