ഇറാനെതിരായ സൈനിക നീക്കങ്ങൾക്ക് സൗദി അറേബ്യയുടെ ആകാശമോ ഭൂമിയോ ഉപയോഗിക്കാൻ അനുവദിക്കില്ല; നിലപാട് വ്യക്തമാക്കി കിരീടാവകാശി മുഹമ്മദ് ബിൻ സൽമാൻ

ഇറാൻ്റെ പരമാധികാരത്തെ ബഹുമാനിക്കുന്നതായും ഇറാനെതിരെയുള്ള സൈനിക നീക്കങ്ങൾക്കായി സൗദി അറേബ്യയുടെ ആകാശമോ ഭൂമിയോ വിട്ടുനൽകില്ലെന്നും സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ രാജകുമാരൻ വ്യക്തമാക്കി.

ചൊവ്വാഴ്ച ഇറാൻ പ്രസിഡന്റ് മസൂദ് പെസെഷ്കിയാനുമായി നടത്തിയ ടെലിഫോൺ സംഭാഷണത്തിലാണ് അദ്ദേഹം ഈ നിർണ്ണായക നിലപാട് അറിയിച്ചത്.

ഏത് ദിശയിൽ നിന്നുള്ളതോ ഏത് ഉറവിടത്തിൽ നിന്നുള്ളതോ ആയ ആക്രമണങ്ങൾക്കും സൗദിയുടെ മണ്ണോ ആകാശമോ ഉപയോഗിക്കാൻ അനുവദിക്കില്ലെന്ന് കിരീടാവകാശി ഉറപ്പുനൽകി.

മേഖലയുടെ സുരക്ഷയും സ്ഥിരതയും വർദ്ധിപ്പിക്കുന്ന രീതിയിൽ ചർച്ചകളിലൂടെ തർക്കങ്ങൾ പരിഹരിക്കുന്നതിനാണ് സൗദി മുൻഗണന നൽകുന്നതെന്ന് അദ്ദേഹം ഊന്നിപ്പറഞ്ഞു.

മേഖലയിൽ സമാധാനം കൊണ്ടുവരുന്നതിനായുള്ള ചർച്ചകളെയും സംരംഭങ്ങളെയും സൗദി പിന്തുണയ്ക്കുന്നു. തർക്കങ്ങൾ പരിഹരിക്കാൻ സംവാദത്തിന്റെ പാതയാണ് ഉചിതമെന്നും സൗദി ഭരണകൂടം വിശ്വസിക്കുന്നു.

നിലവിലെ വെല്ലുവിളികൾ നേരിടുന്നതിനായി ഇറാൻ സർക്കാർ നടത്തുന്ന ശ്രമങ്ങളെക്കുറിച്ചും ന്യൂക്ലിയർ വിഷയത്തിൽ നടക്കുന്ന ചർച്ചകളെക്കുറിച്ചും ഇറാൻ പ്രസിഡന്റ് കിരീടാവകാശിയെ വിശദീകരിച്ചു.

ഇറാൻ്റെ പരമാധികാരത്തോടുള്ള സൗദിയുടെ ഉറച്ച നിലപാടിനെ അദ്ദേഹം അഭിനന്ദിച്ചു. മേഖലയിലെ സുരക്ഷ ഉറപ്പാക്കുന്നതിൽ കിരീടാവകാശി നടത്തുന്ന ഇടപെടലുകളെ പെസെഷ്കിയാൻ പ്രത്യേകം പ്രശംസിച്ചു.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa