ഇറാനുനേരെ ഇസ്രായേലിന്റെ കനത്ത വ്യോമാക്രമണം; ഇസ്രായേലിൽ അടിയന്തിരാവസ്ഥ പ്രഖ്യാപിച്ചു, ഖത്തറിൽ ജാഗ്രതാ നിർദ്ദേശം

മിഡിൽ ഈസ്റ്റിലെ സമാധാനശ്രമങ്ങൾക്ക് കനത്ത തിരിച്ചടിയേൽപിച്ചുകൊണ്ട് ശനിയാഴ്ച പുലർച്ചെ ഇറാനിലെ സൈനിക ലക്ഷ്യങ്ങൾക്കുനേരെ ഇസ്രായേൽ ശക്തമായ വ്യോമാക്രമണം നടത്തി.

ഇസ്രായേലിന് നേരെയുള്ള ഭീഷണികൾ ഇല്ലാതാക്കാനുള്ള ‘മുൻകരുതൽ ആക്രമണം’ (Pre-emptive attack) എന്നാണ് ഇതിനെ പ്രതിരോധ മന്ത്രി ഇസ്രായേൽ കാറ്റ്‌സ് വിശേഷിപ്പിച്ചത്.

ആക്രമണത്തിന് പിന്നാലെ ഇറാൻ തലസ്ഥാനമായ ടെഹ്‌റാനിൽ ശക്തമായ സ്ഫോടനങ്ങൾ ഉണ്ടായതായി പ്രാദേശിക മാധ്യമങ്ങൾ റിപ്പോർട്ട് ചെയ്തു. ഇതോടെ മേഖലയിൽ വീണ്ടും നേരിട്ടുള്ള സൈനിക ഏറ്റുമുട്ടലിനുള്ള സാധ്യത വർദ്ധിച്ചിരിക്കുകയാണ്.

കഴിഞ്ഞ ജൂൺ മാസത്തിൽ ഇസ്രായേലും ഇറാനും തമ്മിൽ 12 ദിവസം നീണ്ടുനിന്ന വ്യോമയുദ്ധം നടന്നിരുന്നു. ഇറാന്റെ ആണവ-ബാലിസ്റ്റിക് മിസൈൽ പദ്ധതികൾ അവസാനിപ്പിച്ചില്ലെങ്കിൽ വീണ്ടും ആക്രമിക്കുമെന്ന് യുഎസും ഇസ്രായേലും ആവർത്തിച്ച് മുന്നറിയിപ്പ് നൽകിയിരുന്നതിന്റെ തുടർച്ചയായാണ് ശനിയാഴ്ചത്തെ ആക്രമണം.

ആക്രമണത്തിന് തൊട്ടുപിന്നാലെ ഇസ്രായേലിലെ തൊഴിലിടങ്ങളും സ്കൂളുകളും അടച്ചുപൂട്ടാൻ സൈന്യം ഉത്തരവിട്ടു. സുരക്ഷാ മുൻകരുതലിന്റെ ഭാഗമായി സിവിൽ വിമാനങ്ങൾക്കായി ഇസ്രായേൽ തങ്ങളുടെ വ്യോമപാതയും അടച്ചിട്ടുണ്ട്.

അതേസമയം, ഖത്തറിലെ യുഎസ് എംബസി തങ്ങളുടെ ഉദ്യോഗസ്ഥരോട് സുരക്ഷിത സ്ഥാനങ്ങളിൽ തുടരാൻ നിർദ്ദേശം നൽകുകയും അമേരിക്കൻ പൗരന്മാർക്ക് ജാഗ്രതാ നിർദ്ദേശം നൽകുകയും ചെയ്തു.

ഇറാന്റെ ആണവ അടിസ്ഥാന സൗകര്യങ്ങൾ പൂർണ്ണമായും തകർക്കണമെന്നാണ് ഇസ്രായേലിന്റെ ഉറച്ച നിലപാട്. എന്നാൽ ഉപരോധങ്ങൾ നീക്കിയാൽ ആണവപദ്ധതികളിൽ നിയന്ത്രണം ഏർപ്പെടുത്താമെന്ന് ഇറാൻ സമ്മതിച്ചിരുന്നെങ്കിലും മിസൈൽ സാങ്കേതികവിദ്യയുടെ കാര്യത്തിൽ വിട്ടുവീഴ്ചയ്ക്കില്ലെന്ന് അവർ വ്യക്തമാക്കിയിരുന്നു.

കഴിഞ്ഞ ജൂണിൽ ഇറാന്റെ ആണവ കേന്ദ്രങ്ങൾക്ക് നേരെ നടന്ന സൈനിക നീക്കത്തിന് തിരിച്ചടിയായി ഖത്തറിലെ ഏറ്റവും വലിയ അമേരിക്കൻ സൈനിക താവളമായ അൽ ഉദെയ്ദിലേക്ക് ഇറാൻ മിസൈലുകൾ അയച്ചിരുന്നു.

തങ്ങൾക്ക് നേരെ ആക്രമണം ഉണ്ടായാൽ ശക്തമായി തിരിച്ചടിക്കുമെന്ന് ഇറാൻ നേരത്തെ മുന്നറിയിപ്പ് നൽകിയിരുന്നു. നിലവിലെ സാഹചര്യം മേഖലയിലെ സമാധാന ചർച്ചകളെ പൂർണ്ണമായും തകർക്കുമെന്ന ആശങ്കയിലാണ് ലോകരാജ്യങ്ങൾ.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa