ഗൾഫിൽ എത്തിയശേഷം പ്രമേഹം വന്നോ? കാരണം ഇതാണ്

നാട്ടിൽ ആരോഗ്യവാനായിരുന്ന പലരും ഗൾഫിൽ എത്തി കുറച്ച് വർഷങ്ങൾക്ക് ശേഷം പ്രമേഹം സ്ഥിരീകരിക്കുന്ന അനുഭവം ഇന്ന് സർവസാധാരണമാണ്.

പ്രമേഹം വരാൻ കാരണങ്ങൾ പലതുണ്ടെങ്കിലും, ഗൾഫ് മലയാളികൾക്കിടയിൽ ടൈപ്പ് 2 പ്രമേഹം ഇത്രത്തോളം വർധിക്കുന്നതിന് പിന്നിൽ ജീവിതശൈലിയിലെ മാറ്റങ്ങളാണ് പ്രധാന കാരണമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു.

നാട്ടിൽ നടന്നും കൃഷിപ്പണിയും മറ്റും ചെയ്തും ജീവിച്ചിരുന്നവർ ഗൾഫിലെത്തുന്നതോടെ പൊതുവെ ശാരീരിക അധ്വാനം കുറഞ്ഞ ജോലിയിലേക്ക് മാറുന്നു. ഇതോടെ ശരീരത്തിലെ പഞ്ചസാര നിയന്ത്രിക്കാനുള്ള ശേഷിയും കുറഞ്ഞുതുടങ്ങും. ഇതാണ് പ്രമേഹത്തിലേക്കുള്ള ആദ്യ ചുവട്.

ഭക്ഷണശൈലിയിലെ മാറ്റവും വലിയ പങ്ക് വഹിക്കുന്നു. ഗൾഫിലെത്തുമ്പോൾ ഫാസ്റ്റ് ഫുഡും പഞ്ചസാര കലർന്ന പാനീയങ്ങളും ഭക്ഷണക്രമത്തിന്റെ ഭാഗമായി മാറുന്നത് പ്രമേഹത്തിന് കാരണമാകുന്നു.

എണ്ണ കൂടിയ ഭക്ഷണം, രാത്രി വൈകി കഴിക്കുന്ന ശീലം ഇവയെല്ലാം ചേർന്ന് രക്തത്തിലെ പഞ്ചസാര നിരക്ക് ക്രമേണ ഉയർത്തുന്നു. കൂടാതെ ഗൾഫിലെ കടുത്ത ചൂടിൽ പുറത്ത് നടക്കാൻ കഴിയാത്ത അവസ്ഥയും വ്യായാമക്കുറവിന് കാരണമാകുന്നു.

ഉറക്കക്കുറവും സ്ട്രെസ്സും മറ്റൊരു കാരണമാണ്. കൂടുതൽ ഷിഫ്റ്റ് ജോലി ചെയ്യുന്നതും, കുടുംബത്തിൽ നിന്ന് അകന്ന് ജീവിക്കുന്നതും പ്രവാസികളിൽ മാനസിക സമ്മർദ്ദം കൂട്ടിയേക്കാം. സ്ട്രെസ്സ് ഹോർമോണുകൾ രക്തത്തിലെ പഞ്ചസാര നിരക്ക് ഉയർത്തുമെന്ന് ശാസ്ത്രം തെളിയിച്ചിട്ടുണ്ട്.

പ്രമേഹം ആദ്യഘട്ടത്തിൽ ഒരു ലക്ഷണവും കാണിക്കില്ല. അതുകൊണ്ടാണ് ഇതിനെ നിശബ്ദ ഘാതകൻ എന്ന് വിളിക്കുന്നത്. ക്ഷീണം, അമിത ദാഹം, ഇടക്കിടെ മൂത്രമൊഴിക്കൽ, മുറിവ് ഉണങ്ങാൻ വൈകൽ, ഇവ പ്രമേഹത്തിന്റെ സൂചനകളാണ്. ഈ ലക്ഷണങ്ങൾ കണ്ടാൽ ഉടൻ രക്തപരിശോധന നടത്തണം.

ഭക്ഷണനിയന്ത്രണം, ദിവസവും കുറഞ്ഞത് 30 മിനിറ്റ് നടത്തം, പഞ്ചസാര കലർന്ന പാനീയങ്ങൾ ഒഴിവാക്കൽ, അമിതമായി ആശങ്കപ്പെടുന്നത് നിയന്ത്രിക്കൽ എന്നീ കാര്യങ്ങൾ മാത്രം ശ്രദ്ധിച്ചാൽ തന്നെ പ്രമേഹം ഒരുപരിധിവരെ തടയാം.

അറേബ്യൻ മലയാളി വാട്സാപ് ഗ്രൂപിൽ നിങ്ങൾക്കും അംഗമാകാം👇
https://hostinfoarabia.com/arabian_malayali_whatsapp_group_ksa